Heç bir mahiyyəti olmayan, bəzi hallarda əxlaqsızlığı təbliğ edən söhbətlər, səviyyəsiz zarafatlar efirləri zəbt edib
"Bu gün televiziya kanallarımızda yayımlanan bir çox şou proqramlar artıq əyləncə anlayışından uzaqlaşıb, təhlükə və təəssüf doğuran mənzərəyə çevrilib".
Bunu "editor.az" xəbər portalının baş redaktoru Fərid Şahbazlı deyib. Jurnalist bildirib ki, heç bir mahiyyəti olmayan, bəzi hallarda əxlaqsızlığı təbliğ edən söhbətlər, səviyyəsiz zarafatlar, süni qalmaqallar və məqsədsiz qonaqlar efirləri zəbt edib: "Cəmiyyətin mənəvi toxuması bu tip verilişlərlə sarsılır. Xüsusilə də gənclər üçün nümunə rolunu oynayacaq dəyərli simaların yoxluğunda, ekranda “tanınmaq üçün hər şeyə hazır” şəxslərin təqdim olunması gələcək nəsillər üçün təhlükəli tendensiyadır. Gözəllik, intellekt, sənət və əxlaq kimi anlayışlar bu zövqsüzlük içində itib-batır".
F.Şahbazlının fikrincə, televiziya maarifləndirməli, zövq tərbiyə etməli, ictimai məsuliyyət daşımalıdır:
"Təəssüf ki, bu ali vəzifə yerini reytinq naminə istənilən vasitəyə əl atmağa verib. Əlində müəyyən qədər maliyyə imkanı olan istənilən şəxs efirə çıxarılır, məzmunsuz davranışlar təbliğ edilir, cəmiyyətin zövqü ilə eksperiment aparılır. Unutmayaq ki, efir təsadüfi insanların oyuncağı deyil. O, məsuliyyət tələb edən bir məkan, dəyər daşıyıcısı və cəmiyyətin güzgüsüdür. Həmin güzgüdə əks olunan mənzərəni dəyişmək isə həm televiziya rəhbərlərinin, həm də tamaşaçının borcudur. Səviyyə tələb etmək isə tamaşaçının haqqıdır".
