“Osmanlı geri döndü. Ərdoğan Qəzzada təhlükəsizlik qüvvəsinin rəhbəri olacaq”
ABŞ Prezidenti Donald Trampa yaxınlığı ilə tanınan sabiq baş müşaviri Stiv Bennon, sosial mediada yayımlanan “War Room” adlı proqramında Türkiyə ilə bağlı diqqətçəkən fikirlər səsləndirib.
Sherg.az xəbər verir ki, Bennon, Türkiyə bölgədəki təsir gücünü yenidən bərpa etdiyini vurğulayıb:
“Osmanlı geri döndü. Ərdoğan Qəzzada təhlükəsizlik qüvvəsinin rəhbəri olacaq.”
Orta Şərqdə tarazlıqların tamamilə dəyişdiyini qeyd edən Bennon deyib:
“Bir əsr əvvəl sona çatdırılmağa çalışılan nizamı biz iki ayda tərsinə çevirdik.”
Onun sözlərinə görə, ABŞ administrasiyası hazırda Türkiyə və Qətərlə birbaşa əlaqə saxlayır:
“Sahədə təhlükəsizliyə Türkiyə nəzarət edəcək, Qətər maliyyə dəstəyi göstərəcək, Misir, Birləşmiş Ərəb Əmirlikləri və Səudiyyə Ərəbistanı isə əsgər göndərəcək.”
Bennonun fikrincə, Qəzzadakı yeni quruluşun mərkəzində Ankara dayanır:
“Əgər bu gün "yeni Orta Şərq nizamından danışırıqsa, bu nizamın lideri Ərğandır.”
Netanyahunun “Böyük İsrail” layihəsinin uğursuzluğa düçar olduğunu bildirən Bennon əlavə edib:
“Bu layihə Netanyahunun üzünə partladı. Artıq bölgə Ərdoğanın addımlarına görə formalaşır.”
İsrail tərəfdarı dairələrə səslənən Bennon deyib:
“Siz bu siyasətləri dəstəklədiniz, indi qarşınızda yeni güc tarazlığı var -Türkiyənin rəhbərliyində yenidən qurulan Orta Şərq.”
Ağ Evdə çalışarkən ABŞ-ın Orta Şərq siyasətlərinin memarlarından biri olmuş Bennon qeyd edib:
“Ərdoğanın diplomatik və hərbi strategiyası bölgəni yenidən formalaşdırır. Ərdoğan artıq təkcə Türkiyənin deyil, bütövlükdə regionun təhlükəsizliyinin qarantıdır.”
Tarixə də toxunan Bennon söyləyib:
“Osmanlı addımlarını ehtiyatla və səbirli şəkildə atırdı. Ərdoğan da eyni tərzdə irəliləyir. Yüz il əvvəl ingilislər Osmanlını Qüdsdən, Şamdan, Fələstindən çıxarmışdı. İndi vəziyyət tam tərsinə dönüb.”
Bennon Türkiyənin yenidən regional güc statusu qazandığını vurğulayıb:
“Türklər uzun illər səhnədən uzaqlaşdırılmışdı, amma indi yenidən baş roldadırlar.”
Amerikalı siyasətçi bölgədə formalaşan yeni güc sisteminə diqqət çəkərək deyib:
“Artıq üçtərəfli bir nizam yaranır: Müsəlman dövlətləri, xristian Qüdsü və türk təhlükəsizlik zolağı. Bu tablo qarşıdakı 30 ili müəyyən edəcək.”
Bennonun açıqlamaları həm Vaşinqtonda, həm də regional mediada geniş rezonans doğurub. Mütəxəssislər bu fikirləri belə şərh ediblər:
“Bu, Türkiyənin Orta Şərqdə yenidən mərkəzi ölkə statusuna yüksəldiyinin açıq etirafıdır.”
