Türkiyə Prezidenti Rəcəb Tayyib Ərdoğan dünən Dolmabahçə İş Ofisində Ermənistan Baş Naziri Nikol Paşinyanı qəbul edib. Təxminən 1 saat davam edən görüşdə əsas mövzular masaya qoyulub.
Prezident Ərdoğan, Paşinyanı rəsmi mərasimlə qarşılayıb. Mərasimdən sonra hər iki lider heyətlərini təqdim edib və görüşə keçiblər.
Sherg.az xəbər verir ki, danışıqlarda Xarici İşlər Nazirləri Hakan Fidan və Ararat Mirzoyan da iştirak edib.
Ermənistan Milli Məclisinin sədri Alen Simonyan bu səfəri "tarixi" səfər adlandıraraq bildirib ki, "Ermənistan tarixində ilk dəfə bir lider bu səviyyədə Türkiyəni ziyarət edir".
Görüşdə Türkiyə və Ermənistan arasında normallaşma prosesi və atıla biləcək növbəti addımlar müzakirə edilib.
Cənubi Qafqazda sülh və dialoq prosesi, bölgədə baş verən aktual hadisələr gündəmə gətirilib.
Prezident Ərdoğan, Azərbaycan ilə Ermənistan arasında barışıq müzakirələrində əldə olunmuş razılaşmanın vacibliyini vurğulayıb.
Türkiyənin bölgədə “qazan-qazan” prinsipi ilə inkişafı dəstəklədiyini və diplomatiyaya bütün imkanları ilə töhfə verdiyini bildirib.
Ərdoğan, İsrailin İranla qarşıdurmasının yaratdığı təhlükələrə qarşı regionda sabitliyin təmin olunması üçün liderlərlə təmasların davam etdiyini qeyd edib.
