Türkiyənin ədliyyə naziri Yılmaz Tunç Vanda çıxışı zamanı terrorçulara növbəti dəfə xəbərdarlıq edib. O, bildirib ki, Türkiyə terrorçular silahı yerə qoyub təslim olacağı təqdirdə terrorsuz dövlət mərhələsinə qədəm qoyacaq.
Nazir terrorçulara xəbərdarlıq edərək rəsmi Ankaranın əks təqdirdə hüquqi müstəvidə mübarizə aparacağını bildirib:
“Min illik qardaşlığımıza vurulan xəncəri çıxarmaq vaxtıdır. İmperializmin içimizə səpdiyi bu nifaq toxumunu aradan qaldıraraq, birliyimizi gücləndirərək hamımız birlikdə terrordan azad bir Türkiyə quracağıq. Bizim buna böyük ümidlərimiz və inamımız var. Bu məsələdə dövlət başçımızn iradəsi çox güclüdür”.
Suriyada Bəşər Əsəd rejiminin devrilməsinin ardınca PKK terror təşkilatının həbsdə olan lideri Abdullah Öcalanın silahı yerə qoymaqla bağlı tərəfdarlarına çağırışı ilə Türkiyənin terrorla mübarizəsində yeni mərhələ başlandı.
Məlum olduğu kimi, Türkiyə özünün təhlükəsizliyi naminə uzun illərdir ki, terrorla mübarizə aparır. Bu mübarizə həm ölkə daxilində, həm də Suriya və İraqda özünü göstərir. Xüsusilə son illərdə Türkiyənin terrorla mübarizəsində ciddi nəticə əldə olunub. Suriyada Bəşər Əsəd rejiminin devrilməsi ilə rəsmi Ankara üçün bu istiqamətdə tamamilə yeni mərhələ başlanıb.
Əvvəl də dediyimiz kimi, indiyə kimi Türkiyənin terrorla mübarizəsinə mane olan əsas məqamlardan biri məhz Əsəd rejimi idi. Suriyadakı hakimiyyət dəyişikliyi Türkiyənin əlini gücləndirdi. Sözsüz ki, Öcalanın çağırışında və fərqli terror təşkilatlarının pozitiv mesajlarında bu məsələnin də xüsusi rolu var.
Eyni zamanda Türkiyə ilə ABŞ arasında hansısa gizli, hələlik ictimaiyyətə açıqlanmayan razılığın əldə olunması da mümkündür. Əgər belədirsə, yəqin ki, Vaşinqton- Ankara xəttində yeni tendensiyaların şahidi olacağıq.
Nazirin xəbərdarlığına gəldikdə isə bildirməliyik ki, Türkiyə terrorsuz ölkəyə çevrilməkdə israrlıdır. Rəsmi Ankara hansı yolla olursa olsun, buna nail olacaq. Əgər terrorçular tamamilə tərksilah olmaz və terror təşkilatları özlərini ləğv etməzlərsə, Türkiyə “B” variantını seçə, əməliyyatlarını daha da sürətləndirə bilər.
Kənan Novruzov
