İsrail bazarından sonra SOCAR Suriyadakı imkanları nəzərdən keçirir
"Bu gün Bakıda keçid dövrü üçün Suriya prezidenti Əhməd əl-Şaraanın Azərbaycana işgüzar səfəri çərçivəsində Azərbaycan Respublikası Dövlət Neft Şirkəti (SOCAR) ilə Suriya Ərəb Respublikası Hökuməti arasında anlaşma memorandumu imzalanıb.
Suriya mənbələrinin məlumatına görə, SOCAR Suriyanın qaz təminatında və Suriyanın şimal-şərqindəki neft-qaz yataqlarının yenidən qurulmasında iştirak etməyə dəvət edilib".
Sherg.az xəbər verir ki, bu haqda Neft sahəsi üzrə tanınmış ekspert, Neft Araşdırmaları Mərkəzinin rəhbəri İlham Şaban deyib.
Onun sözlərinə görə, 2025-ci il aprelin 11-13-də Antalyada keçirilən diplomatik forum çərçivəsində keçirilən ilk ikitərəfli görüşdə Əliyev və Əhməd əl-Şaraa Azərbaycanın Suriyanın enerji sektorunun bərpasında mümkün iştirakını müzakirə ediblər:
"Bunun ardınca may ayında Suriya prezidenti baş nazirin müavini Samir Şərifovun rəhbərlik etdiyi Azərbaycan nümayəndə heyətini qəbul edib və görüşdə iqtisadi məsələlər müzakirə obyekti olub".
