Rusiya Bakı və İrəvanın "3+3" platformasına üzv ölkələrin xarici işlər nazirlərinin növbəti görüşlərinin keçirilmə ardıcıllığı ilə bağlı razılığa gələcəyini gözləyir.
Sherg.az xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə bildirib.
O xatırladıb ki, müvafiq razılaşma 2024-cü ilin oktyabrında İstanbulda keçirilən iclasın yekunları əsasında əldə olunub.
Zaxarova deyib:
"2026-cı il iyunun 5-də Sankt-Peterburq Beynəlxalq İqtisadi Forumu çərçivəsində keçirilən '3+3' platformasının ilk ekspert sessiyasında iştirakçılar siyasi məsələləri ön plana çıxarmadan, konkret və qarşılıqlı faydalı iqtisadi layihələrə diqqət yetirilməsinin tərəfdarı olduqlarını bildirdilər. Biz bu yanaşmanı tam dəstəkləyirik."
Xatırladaq ki, 2025-ci il dekabrın 8-də Azərbaycanın xarici işlər naziri Ceyhun Bayramov iranlı həmkarı Seyid Abbas Əraqçi ilə birgə mətbuat konfransında bildirmişdi ki, Azərbaycan "3+3" regional platformasının növbəti iclasının əvvəlcə Azərbaycanda, daha sonra isə Ermənistanda keçirilməsini təklif edib.
Bayramovun sözlərinə görə, bu məsələ ilə bağlı razılıq əldə olunmayıb, çünki Ermənistan tərəfi belə ardıcıllıqla razılaşmayıb.
Buna cavab olaraq Ermənistan tərəfi bəyan edib ki, "3+3" regional platformasının növbəti görüşünün keçiriləcəyi məkanla bağlı müzakirələr davam edir.
Rusiya "3+3" formatının yaradılmasını fəal şəkildə dəstəkləyib. Platformaya Ermənistan, Azərbaycan, Gürcüstan, Rusiya, İran və Türkiyə daxildir.
Hazırda Gürcüstan platformanın fəaliyyətində iştirak etmir. Bununla belə, digər iştirakçılar dəfələrlə bildiriblər ki, Tbilisi üçün bu formata qoşulmaq imkanı açıq qalır.
İndiyədək platformanın üç görüşü növbə ilə Moskva, Tehran və İstanbul şəhərlərində keçirilib.
