Dünyanın əksər şəhərlərində siçovulları görmək adi hala çevrilir. Sağlamlıq üçün təhlükə yaradan, eləcə də infrastruktura ziyan vuran, yanğınlara səbəb olan və qida təhlükəsizliyini təhdid edən bu gəmiricilərin sayının niyə artdığı uzun müddətdir bilinmirdi. Lakin alimlər bu problemin mənbəyini geniş araşdırmalar nəticəsində müəyyən ediblər.
Sherg.az xəbər verir ki, ABŞ-da illik zərərinin 27 milyard dollar olduğu təxmin edilən siçovulların dünya miqyasında yayılması artıb.
Alimlərin fikrincə, siçovulların sayının sürətlə artmasının səbəbi iqlim dəyişikliyidir.
Gəmiricilər infrastruktura ziyan vurur, qidaları çirkləndirir və ciddi iqtisadi itkilərə səbəb olur.
Richmond Universitetindən Conatan Riçardson və onun komandası ABŞ, Kanada, Yaponiya və Hollandiyanın 16 şəhərində siçovulların populyasiyasını tədqiq ediblər.
“Science Advances” jurnalında dərc edilən araşdırmaya görə, siçovulların sayındakı artımın 40 faizi temperaturun artması ilə bağlıdır. İsti hava gəmiricilərin daha uzun müddət aktiv qalmasına və çoxalmasına imkan verir.
Ən böyük artımlar Vaşinqton, San Fransisko, Toronto, Nyu-York və Amsterdamda baş verib. Nyu-Yorkda 162 faiz, Vaşinqtonda isə 300 faiz artım olub. Lakin Yeni Orlean, Luisvil və Tokioda siçovulların sayı azalıb. Tokioda azalma insanların təmizliyə olan diqqətliliyi ilə əlaqələndirilib. Yeni Orleanda isə bu, şəhər hökumətinin effektiv mübarizə siyasəti ilə əlaqələndirilirib.
Mütəxəssislər vurğulayırlar ki, siçovulların öldürülməsi həll yolu deyil, onların qida tullantılarına və zibillərə çıxışını məhdudlaşdırmaq daha effektiv üsuldur. Riçardson deyir ki, iqlim dəyişikliyi siçovulların sayının artması ilə əlaqədardır, lakin problemi erkən həll etmək vacibdir.
