Antalyada keçmiş həyat yoldaşı, 36 yaşlı Pınar Zorlunun üstünə benzin tökərək onu yandıran və ölümünə səbəb olan Gürhan Üzər, 21 aprel tarixində keçirilməsi planlaşdırılan ikinci məhkəmə iclası öncəsi xərçəng xəstəliyindən vəfat edib.
Məlumata görə, Üzər fevral ayının ilk həftəsindən etibarən Antalya Şəhər Xəstəxanasında müalicə alırdı. 4-cü mərhələ pankreas xərçəngi səbəbilə orqan çatışmazlığı yaşayan qatil, bir müddətdir reanimasiya şöbəsində saxlanılırdı.
Sherg.az xəbər verir ki, qatilin ölümü ilə birlikdə cinayət işi üzrə məhkəmə prosesi dayandırılıb.
31 dekabr 2024-cü il səhəri baş verən hadisədə Pınar Zorlu işə getmək üçün evindən çıxarkən, onu izləyən keçmiş həyat yoldaşı Gürhan Üzər tərəfindən qarşısı kəsilmişdi. Üzər, özü ilə gətirdiyi bidondakı benzini Pınar Zorlunun üstünə tökərək onu yandırmış və ağır yaralanmasına səbəb olmuşdu.
35 yaşlı Pınar Zorlu 19 gün boyunca Antalya Şəhər Xəstəxanasının reanimasiya şöbəsində yaşamaq uğrunda mübarizə aparmış, lakin 18 yanvar 2025-ci ildə vəfat etmişdi.
Hadisə ilə bağlı açılan cinayət işinin ilk məhkəmə iclası 24 fevral 2025-ci ildə Antalya 4-cü Ağır Cəza Məhkəməsində keçirilsə də, qatil Gürhan Üzər səhhəti səbəbilə iştirak etməmişdi.
Məhkəmədə ifadə verən Pınar Zorlunun atası Ramazan Zorlu, qızının hadisədən əvvəl onu axtararaq qatilin iş yeri qarşısında olduğunu dediyini, xəstəxanaya aparılmamışdan əvvəl isə ona "Oğluma sahib çıx" dediyini söyləmişdi.
