Çinli alimlər, Tiangong Kosmik Stansiyasının daxili bölmələrindən birində yerə məxsus bakteriyanın yeni bir növünü – Niallia tiangongensis– aşkarlayıblar. Bu kəşfin gələcək kosmos missiyaları, astronavt sağlamlığı və biotəhlükəsizlik baxımından mühüm nəticələr doğura biləcəyi qeyd olunur.
Sherg.az xəbər verir ki, yeni mikrob növü radiasiya nəticəsində yaranan zədələri bərpa etmə qabiliyyətinə və oksidativ stressə qarşı müqavimətə malikdir. Həmçinin, yalnız kosmosa xas olan stres faktorlarına qarşı da yüksək dözümlülük göstərdiyi bildirilib.
Bu tapıntı, bəşəriyyətin uzunmüddətli Ay və Mars missiyalarına hazırlaşdığı dövrdə mikroorqanizmlərin kosmosa necə uyğunlaşdığını anlamaq baxımından vacib hesab olunur. Bu yalnız kosmos üçün deyil, həm də Yer kürəsindəki elmi-tibbi tətbiqlər üçün də əhəmiyyət daşıyır.
Shenzhou-15 missiyası zamanı astronavtlar, 2023-cü ilin mayında Tiangong-un daxili hissələrindən steril salfetlərlə mikrob nümunələri toplayıblar. Toplanmış nümunələr çox aşağı temperaturda qorunaraq Yerə qaytarılıb və genomik, metabolik və filogenetik analizlərə məruz qalıb.
Tədqiqatçılar, yeni növün cytobacillaceae ailəsinin niallia cinsinə aid olduğunu müəyyən ediblər. Lakin bu növ, Yer üzərindəki tanınmış qohumlarından genetik baxımdan fərqlidir.
Niallia və Cytobacillus cinsləri çubuq formalı, sərt şəraitə davamlı bakteriyalardan ibarət olub, Bacillaceae ailəsinin üzvləridir və dünyadakı ən davamlı bakteriyalardan sayılır.
Yeni mikrobun Tiangong stansiyasının unikal mühitinə uyğunlaşdığı və ya xüsusi xüsusiyyətlər inkişaf etdirdiyi ehtimal olunur. Bu da onu həm genetik, həm də funksional baxımdan Yer mənşəli analoqlarından fərqləndirir.
Tədqiqatçılar hələlik Niallia tiangongensis bakteriyasının Tiangong stansiyasındakı astronavtlar üçün birbaşa sağlamlıq təhdidi olub-olmadığını müəyyənləşdirməyiblər. Araşdırmalar davam edir.
