Doqquz ay Beynəlxalq Kosmik Stansiyada qapalı vəziyyyətdə, çıxılmaz durumda qalmış Batç Uilmor və Suni Vilyams başlarına gələni ilk dəfə "Fox News" telekanalına danışıblar.
“Sherg.az” “Milliyet.com.tr”yə istinadən bildirir ki, astronavtlar "Boeing" tərəfindən hazırlanmış "Starliner" adlı eksperimental kosmik gəmini sınaqdan keçirmək üçün 5 iyun 2024-cü ildə stansiyaya yol alıb.
8 gün davam etməsi planlaşdırılan missiya "Starliner"dəki texniki nasazlıqların yaratdığı təhlükəsizlik riskləri səbəbiylə təxminən 9 ay davam edib və iki astronavt bu müddət ərzində stansiyada qapalı vəziyyətdə qalıblar. İki astronavt 19 martda SpaceX-in "Dragon" kosmik gəmisi ilə Yerə qayıda bilib.
Telekanala müsahibələrində astronavtlar gözlənilməz hadisələrin hamının buraxdığı ümumi səhvlərdən qaynaqlandığını bildiriblər. "Boeing" və NASA-nın görmədikləri "sınaq və hazırlıq nöqsanlarından" məsul olduğunu söyləyən Uilmor, "Etiraf etməliyəm. Elə şeylər var ki, soruşmalı idim, amma soruşmadım. O zaman bu sualları verməliydim. Amma geriyə baxanda indi görürəm ki, bütün bu prosesin baş verəcəyinə dair siqnallar var idi. Hər kəs bunun işləməyəcəyini qəbul etdi", deyib. O, kosmik stansiyada planlaşdırıldığından daha uzun müddət qalacaqlarını ilk anlayanda yeni vəzifələrə hazırlaşdıqlarını söyləyib: “Evə gec gələcəyimiz aydın olanda düşündüm ki, stansiyada əlimizdən gələni etməliyik. Dərhal işə başlamağa və bizə verilən tapşırıqları öhdəmizə götürməyə hazır idik”. Uilmor deyib ki, müddətin uzadılacağını öyrənəndə ağlına ilk gələn ailəsi olduğunu, əvvəlcə qızının orta məktəb illərini qaçıracağından narahat olduğunu, lakin bir müddət sonra övladlarını belə hallara tab gətirmək üçün böyütdüyünü xatırladığını deyib. "Biz evə planlaşdırıldığı kimi çatmadıq. Beləliklə, bir tərifdə ilişib qaldıq. Amma böyük şəkildə, biz ilişib qalmadıq. Planlanmışdıq, öyrədilmişdik. "Starliner" inventarımızdakı ən möhkəm kosmik gəmidir. Onun edə biləcəyi hər şeyi edə biləcək başqa bir kosmik gəmi yoxdur”, deyən Uilmordan "Boeing" tərəfindən hazırlanmış "Starliner" vasitəsində yaşanan problemlərin şirkətə qarşı inamsızlıq yaratıb-yaratmadığını soruşduqda, o, “bunu belə təsvir etməzdim. Kosmik gəmi bütün müxtəlif sistemləri bir araya gətirməsi baxımından olduqca mürəkkəbdir”, söyləyib. Qeyd edilir ki, D.Tramp və Mask fevral ayında Bayden administrasiyasının astronavtları Beynəlxalq Kosmik Stansiyada “siyasi səbəblərə görə” tərk etdiyini iddia etmişdilər. Keçən həftə NASA sözçüsü Bethani Stevens "Fox News"a verdiyi açıqlamada Tramp administrasiyasının astronavtların təhlükəsiz geri qayıtmasından məsul olduğunu bildirərək, “Prezident Trampın müdaxiləsi olmasaydı, bu baş verməzdi” deyib.
