Yekaterinburqda iyunun 27-də Rusiya hüquq mühafizə orqanlarının azərbaycanlılara qarşı keçirdiyi əməliyyat nəticəsində saxlanılan Ayaz Səfərov barəsində çıxarılan həbs qətimkan tədbirindən apellyasiya şikayəti verilib.
APA-nın Rusiya bürosu xəbər verir ki, Sverdlovsk vilayət məhkəməsi A. Səfərovun apellyasiya şikayətini təmin etməyib, birinci instansiya məhkəməsinin qərarı qanuni qüvvəyə minib.
Məhkəmədən bildirilib ki, Ayaz Səfərov həbsdə qalacaq.
Yekaterinburq şəhərinin Leninski rayon məhkəməsinin 29 iyun 2025-ci il tarixli qərarı ilə Səfərov Ayaz Möhbalı oğlu barəsində 2025-ci il iyulun 19-dək həbs qətimkan tədbiri seçilib. İbtidai istintaq orqanları Səfərovu Rusiya Federasiyası Cinayət Məcəlləsinin 105.2 maddəsi (“Bir qrup şəxs tərəfindən qabaqcadan əlbir olaraq və ya mütəşəkkil dəstə tərəfindən törədilmiş qətl”) ilə nəzərdə tutulmuş cinayəti törətməkdə ittiham ediblər.
Qeyd edək ki, iyunun 27-də Rusiya hüquq-mühafizə orqanlarının Yekaterinburqda azərbaycanlılara qarşı keçirdiyi əməliyyat nəticəsində iki nəfər-Ziyəddin və Hüseyn Səfərov qardaşları öldürülüb, 8 nəfər-Məzahir, Ayaz, Akif, Kamal, Bakir Səfərovlar, Əhliman Gənciyev, Şahid Lalayev və Əziz Abbasov həbs olunublar. Onlara qarşı 2001, 2010 və 2011-ci illərdə törədilmiş cinayətlər iştirak ittihamı irəli sürülüb.
