Azərbaycanın Xarici İşlər Nazirliyi mina partlayışı ilə əlaqədar beynəlxalq ictimaiyyəti hərəkətə keçməyə çağırıb. Bu barədə xarici siyasət idarəsinin sosial şəbəkə hesabında paylaşım edilib. Məlumatda qeyd olunub ki, bu gün, növbəti mina partlayışı nəticəsində kiçik yaşlı uşaqlar da daxil olmaqla 4 Azərbaycan vətəndaşı ağır yaralanıb. 2020-ci il müharibəsindən bəri Ermənistanın mina çirklənməsi səbəbindən 392 nəfər ya həlak olub, ya da yaralanıb.
Xarici İşlər Nazirliyi beynəlxalq ictimaiyyəti hərəkətə keçməyə çağırıb. Beynəlxalq ictimaiyyəti minaəleyhinə fəaliyyətin təcililiyini tanımağa, Azərbaycanın davam edən minatəmizləmə səylərində onunla birgə olmağa, həmçinin günahsız insanların həyatını təhlükə altına almağa və münaqişədən sonrakı bərpa işlərinə maneə törətməyə davam edən Ermənistanı məqsədyönlü və geniş yayılmış mina çirklənməsinə görə məsuliyyətə cəlb etməyə çağırırıq.
Hərbi ekspert Emil Həsənli “Sherg.az”a bildirib ki, Ermənistan beynəlxalq hüquqla ən ağır cinayətləri törədib:
“Onların həyata keçirdiyi işğalçılıq, soyqrım və separatizm kimi cinayətlərə beynəlxalq aləm lazım olan reaksiyanı vermir. Birləşmiş Millətlər Təşkilatının Təhlükəsizlik Şurasının qətnamələri yerinə yetirilməyib. 2020-ci ildən sonra isə 392 nəfərin mina terroruna qurban getməsi və yaralanması göstərir ki, Qarabağ Ermənistanın mina ilə çirkləndirdiyi dünyanın ən böyük ərazilərindən birinə çevrilib. Ermənilərin məqsədi azərbaycanlıların həlak olaraq Qarabağa geri qayıtmasını əngəlləməkdir. Azərbaycan dövləti isə minaları təmizləyərək əraziləri bərpa edir. Qısa zamanda rayonlar, kəndlər bərpa olunur, hava limanları tikilir və avtomobil yolları salınır. Ukrayna hələ azad olunmayıb, amma onun gələcəkdə bərpasına dəstək göstərilir. Lakin beynəlxalq qurumlar tərəfindən Qarabağa yetərincə yardım verilmir. Minaların təmizlənməsi dünya birliyi, Amerika və Avropa İttifaqı kifayət qədər maliyyə vəsaiti ayırmır. Bu isə beynəlxalq aləmin ikili standartlarında xəbər verir. Azərbaycanın işğal məsələsini təkbaşına həll etdiyi kimi, Ermənistanı da özü sülhə gətirəcək və mina təmizlənməsini həyata keçirəcək”.
