Bu gün futbol üzrə Avropa çempionatının qrup mərhələsində II turun növbəti 3 oyunu keçiriləcək.
"Report"un məlumatına görə, görüşlərdən ikisi F, biri isə E qrupunda oynanılacaq.
Günün ilk matçı F qrupunda Macarıstan və Fransa yığmaları arasında olacaq. Macarıstanın paytaxtı Budapeştdəki "Puşkaş Arena"da baş tutacaq qarşılaşma Bakı vaxtı ilə saat 17:00-da başlayacaq. Oyunu ingiltərəli Maykl Oliver idarə edəcək. İlk turda Almaniyanı 1:0 hesabı ilə məğlub edən Fransa qələbə qazanacağı təqdirdə 1/8 final mərhələsinə vəsiqəni təmin edəcək.
Qrupun digər görüşündə son çempion Portuqaliya Almaniya ilə üz-üzə gələcək. Münhendəki eyniadlı stadionda keçiriləcək oyun Bakı vaxtı ilə saat 20:00-da başlayacaq. Bu qarşılaşmanın baş hakimi ingiltərəli Entoni Teylor olacaq. İlk oyunda macarları 3:0 hesabı ilə üstələyən Portuqaliya güclü rəqibinə də qalib gəlsə, növbəti raundda iştirakı rəsmiləşdirəcək.
Günün son matçında 3 qat Avropa çempionu Polşanı sınağa çəkəcək. Sevilya şəhərindəki "Estadio La Cartuja" stadionundakı matç Bakı vaxtı ilə saat 23:00-da başlayacaq. Oyunu italiyalı Daniele Orsato idarə edəcək. İspanlar ilk oyunda İsveçlə qolsuz heç-heçə edibsə, Polşa Slovakiyaya 1:2 hesabı ilə uduzub.
Avropa çempionatı
F qrupu, II tur
17:00. Macarıstan - Fransa
Baş hakim: Maykl Oliver (İngiltərə)
Budapeşt. "Puşkaş Arena"
20:00. Portuqaliya - Almaniya
Baş hakim: Entoni Teylor (İngiltərə)
Münhen. "Münhen Arena"
23:00. İspaniya - Polşa
Baş hakim: Daniele Orsato (İtaliya)
Sevilya. "Estadio La Cartuja" stadionu
