Azərbaycan Premyer Liqasının XXIII turun açılış günündə “Sumqayıt” və “Zirə” komandaları üz-üzə gəlib.
Teleqraf xəbər verir ki, Mehdi Hüseynzadə adına Sumqayıt şəhər stadionunda baş tutan qarşılaşmada “Zirə” səfərdə böyükhesablı qələbəyə sevinib-3:0.
“Qartallar”ın hücumçusu braziliyalı Rafael Utsiq 14-cü dəqiqədə hesabı açıb. Qvineyalı müdafiəçi Salifi Suma isə 36 və 65-ci dəqiqələrdə rəqib qapısına yol taparaq “dubl” edib.
Bu nəticə ilə “Sumqayıt” ardıcıl 7-ci oyundur rəqib qapısına qol vura bilmir.
Vaqif Cavadovun komandası 22 xalla turnir cədvəlinin VII pilləsində qərarlaşıb. “Qartallar” isə xal sayını 42-ə çatdıraraq II yerdə qərarlaşan “Araz-Naxçıvan”la fərqi 2-ə endirdilər.
Qeyd edək ki, XXIII turun sabah keçiriləcək görüşlərində “Turan Tovuz” -Araz-Naxçıvan”, “Neftçi”-Qarabağ” komandaları üz-üzə gələcək. Turun son günü “Kəpəz” evdə “Şamaxı”nı, “Səbail” isə “Sabah”ı qəbul edəcək.
