Almaniyada 58 yaşlı milyarder Roman Abramoviçlə bağlı araşdırma aparılır.
APA-nın “ Spiegel Online”-yə istinadən verdiyi xəbərə görə, Frankfurt-na-Mayn Prokurorluğu milyarderin sanksiyalardan yayınmasından şübhələnir.
Prokurorluq araşdırmaya başlayıb və biznesmenə məxsus olduğu ehtimal edilən 4 lüks avtomobilin üzərinə həbs qoyulması barədə qərar verib. Söhbət dəyəri bir neçə milyon avro olan “Mercedes CLK GTR”, “Lamborghini Reventón” və 2 ədəd “Bugatti Chiron” markalı avtomobillərdən gedir.
Bununla bərabər, Cinayət İşləri üzrə Federal İdarə və Sanksiyaların İcrası üzrə Mərkəzi İdarənin təhqiqatçıları son sahibi Roman Abromoviçin olduğu düşünülən Garmiş-Partenkirxendəki (Bavariya) villalardan birində bir neçə dəfə axtarış aparıblar. Sübut qismində bir neçə sənəd əsəri müsadirə olunub.
Qeyd edək ki, 19-cu əsrin sonlarında tikilən villa Rusiyanın sabiq prezidenti Boris Yeltsinin qızı Tatyana Dyaçenkoya məxsus olub. 2005-ci ildə Garmiş-Partenkirxen meri bildirib ki, Roman Abromoviç öz şirkətlərinin biri üzərindən bu villanı alıb. Hazırda Almaniyada daşınmaz əmlak reyestrində villanın sahibi qismində “Parados Limited” şirkəti yer alıb. Bu firma Lixtenşteyndə qeydiyyatdan keçib.
Milyarderin vəkili isə bəyan edib ki, müvəkkili nə həmin villanın, nə də qeyd olunan avtomobillərin son sahibi deyil.
Əgər təhqiqatçılar daşınmaz əmlak və avtomobillərlə əlaqədar qanun pozuntusunu sübuta yetirərlərsə, Roman Abramoviçi 1 ilə qədər azadlıqdan məhrumetmə, yaxud cərimə gözləyir.
Roman Abramoviç Rusiyanın Ukraynaya müdaxiləsindən sonra 2022-ci ilin martında Rusiya Prezidenti Vladimir Putinlə uzun müddət sıx əlaqədə olan oliqarx kimi Avropa İttifaqı və Böyük Britaniyanın sanksiyasına məruz qalıb.
