İspaniyanın "Barselona" klubunun futbolçusu Robert Levandovski Polşa millisindəki karyerasını dayandırıb.
Teleqraf-ın məlumatına görə, bu barədə 36 yaşlı hücumçu sosial şəbəkə hesabı vasitəsilə açıqlama verib.
O, mövcud durumu və millinin baş məşqçisi Mixal Probejə etimadın itməsini nəzərə alaraq, millidən imtina etdiyini bildirib. Levandovski Probejin bu vəzifədə çalışacağı müddətdə komandaya qayıtmayacağını diqqətə çatdırıb: "Ümidvaram ki, gələcəkdə dünyanın ən yaxşı azarkeşləri üçün oynaya biləcəyəm".
Probej Polşa yığmasına 2023-cü ilin sentyabrında baş məşqçi təyin olunub. Onun dövründə milli komanda 2024-cü il Avropa çempionatında qrupda qalıb. Lakin Polşa Futbol Assosiasiyasının prezidenti Tsezari Kuleşa baş məşqçiyə tam dəstəyini ifadə edib.
Qeyd edək ki, Robert Levandovski 85 qolla Polşa yığmasının tarixdə ən yaxşı bombardiridir. O, millidə 2008-ci ildən çıxış edir.
