"Kamal Umudlu oyunu çox düzgün idarə edirdi".
Teleqraf xəbər verir ki, bunu "Qarabağ"ın baş məşqçisi Qurban Qurbanov Azərbaycan Premyer Liqasının XXVI turunda evdə "Araz-Naxçıvan"la 1:1 hesablı heç-heçə etdikləri oyunda baş verən insidentlə bağlı danışarkən deyib.
53 yaşlı mütəxəssis futbolçuları Musa Qurbanlı və Elvin Cəfərquliyevin AFFA İntizam Komitəsi tərəfindən cəzalanmasının fonunda qarşılaşmanın hakimlərinin də cəzalanmalı olduğunu bildirib: "VAR-da UEFA dərəcəli Əliyar Ağayev heçnəyi görmürdü? Hər şeyi çox da gözəl epizodu görürdü! Baş hakim FIFA referisi Kamal Umudlu da oyunu çox düzgün idarə edirdi. Hamıya yerindəcə sarı vərəqə verdi. Əgər AFFA İntizam Komitəsi qərar verirsə, o zaman hakimləri də cəzalandırsınlar. Ağayevə də, Umudluya da 3-5 oyunluq cəza verilsin".
Qeyd edək ki, AFFA İntizam Komitəsi "Qarabağ" - "Araz-Naxçıvan" oyununda baş verənlərə görə bir sıra futbolçunu cəzalandırıb. Ağdam klubundan Musa Qurbanlı ilə Elvin Cəfərquliyev 1 oyun şərti olmaqla 2 oyun, qonaq komandadan isə Felipe Santos 2 oyun şərti olmaqla 4 oyunluq cəzalandırılıb.
