“Hər oyuna hazır heyətlə çıxmağa çalışırıq”.
Teleqraf xəbər verir ki, bunu “Qarabağ”ın baş məşqçisi Qurban Qurbanov Azərbaycan Premyer Liqasının XXX turunda səfərdə “Səbail”i 4:1 hesabı ilə məğlub etdikləri oyundan sonra mətbuat konfransında deyib.
53 yaşlı mütəxəssis qələbə münasibəti ilə futbolçularını təbrik edib: “Birinci hissədə öndə idik. Futbolçularıma təşəkkür edirəm. Azarkeşlər də oyundan çıxmağa qoymadılar. Çox sağ olsunlar”.
Baş məşqçi “Neftçi” ilə oyuna ciddi hazırlaşdıqlarını bildirib: “Yanvardan sonrakı proqramımızdan narazıyıq. Çünki ard-arda 3-4 gün məşq edə bilmirdik. Oyunlar ardıcıl olurdu. Futbolçularla normal məşğul ola bilmirik. “Neftçi” ilə oyuna 8 gün var. Yaxşı hazırlaşacağıq. Məşq ritmini tuta biləcəyik. Kuboka da hazırlaşmağa vaxtımız olacaq. Sıx qrafik olduqda rotasiyalar edirik. Hər oyuna hazır heyətlə çıxmağa çalışırıq. Sadəcə oyunun gedişində müəyyən dəyişikliklər ola bilir. Həm derbiyə, həm də kubok oyununa ciddi hazırlaşırıq. Qarşıda avrokuboklarda oyunlarımız olacaq. Ona görə futbolçular hazır olmalıdır”.
Qurban Qurbanov AFFA İcraiyyə Komitəsinin iclasında 4-cü dəfədir iştirak etməməsinə görə üzrlü hesab olunması barədə danışıb:
“Heç bir iclasa üzrsüz qatılmadığım olmayıb. Ya avrokubok oyunu olub, ya Tovuzda olmuşam. Demişəm ki, üzrlü sayın, iştirak edə bilməyəcəm. Üzrlü getməmişəm. Futbolçularımın yanında olmaq üçün. Üzrsüz şəkildə heç vaxt belə etməmişəm. AFFA prezidenti Rövşən Nəcəf və digər üzvlər məni anlayışla qarşılayıb”.
