Özü göz yandıran soğanın son günlər artan qiyməti də könül açmır. Cəmi bir ay əvvəl 50 qəpiyə satılan bostan bitkisinin kiloqramını indi ən yaxşı halda 80 qəpiyə almaq olar.
ATV xəbər verir ki, daha çox soğan əkini ilə məşğul olan Ağdamlı fermerlər deyirlər ki, 2023-cü ildə soğan əkini çox olduğuna görə, əksər fermerlər məhsulu istədikləri qiymətə sata bilmədiklərindən ziyana düşüblər. Buna görə də, növbəti ildə az məhsul əkiblər.
Millət vəkili Vüqar Bayramovun sözlərinə görə, kənd təsərrüfatı məhsullarının qiymət artımının qarşını almaq üçün saxlanma kameralarının sayının artırılmasına ehtiyac var.
İqtisadçı-ekspert Asif İbrahimov “Sherg.az”a bildirib ki, Azərbaycanda ən çox tələbat olan tərəvəz bitkilərindən biri soğandır:
“Azərbaycan soğanı dünyada özünün yüksək keyfiyyəti ilə seçilir. Bu baxımdanda Gürcüstanda, Ukraynada, Rusiyada, Polşada, Moldovada, Türkmənistanda, Belarusda, Pakistanda, Səudiyyə Ərəbistanında, BƏƏ-də, Qətərdə də istehlakçıların maraq dairəsindədir. Bundan öncəki illərdə bu tərəvəz məhsulu daxili tələbatı tam ödəmədiyi üçün Nazirlər Kabineti tərəfindən ölkədən çıxarılmasına rəsmi qadağa qoyulmuşdu. Rəsmi qadağa olmadığı təqdirdə isə qeyri rəsmi olaraq laborator analizlərdə uyğunsuzluqlar çıxması səbəbindən ölkədən çıxarılmasına ara sıra qadağalar tətbiq edilir. Qiymət statistikasına nəzər yetirsək, keçən ilin bu aylarında soğanın qiyməti 1,45 Azn-ə qədər qalxmışdı. Yəni, ilin bu aylarında həm evlərdə istifadə olunan, həm də müxtəlif restoranlar şəbəkələrinin məhsul spesifikasiyalarının tələblərinə cavab verən soğan bahalaşır. Buna səbəb isə Azərbaycanda soğanın saxlanılması üçün xüsusi anbarların olmamasıdır. Yəni fermerlər adi quru anbarlardan istifadə edir. Ümumiyyətlə avqust-sentyabr aylarında istehsal edilən soğan qışda satışa çıxarılması üçün anbarlarda saxlanılmalıdır. Məhsulu qapalı depoda 4 ay, açıq depoda isə maksimum 2 ay saxlamaq mümkündür. Bundan sonra məhsul xarab olmağa,çürüməyə,cücərməyə başlayır”.
