Azərbaycan üçün Avropanın qaz bazarında unikal şərait yaranıb
"Avropanın Rusiya qazından imtinasi Azərbaycan qazının imkanlarıni genişləndirir".
Bu sözləri "Sherg.az"a açıqlamasında Milli Cəbhə Partiyasının başqan müavini, siyasi ekspert Məhəmməd Əsədullazadə deyib. Ekspert bildirib ki, Ukraynanın Rusiya qazının Mərkəzi Avropaya tranzitindən imtina etməsi, Kremlin böyük bazar itirməsinə səbəb oldu:
"Bununla da, Rusiyanın Avropaya qaz ixracına son qoyuldu. Rusiya milyardlarla dollar vəsait itirdi. Bu, Rusiyanın valyuta ehtiyatlarının tükənməsinə gətirib çıxaracaq. Avropa Rusiyanın Qərb banklarında vəsaitini bloklayıb. Bir tərəfdən də qaz alışını dayandırdı, sanksiyaları genişləndirdi. Məhz ABŞ-nin əsas strateji hədəfi Avropanın Rusiya qazından asılılığına son qoymaq idi. Rusiya Türkiyə vasitəsilə çalışacaq ki, öz qaz ixracını həyata keçirsin. Avropa İttifaqı müəyyən dərəcədə buna yaşıl işıq yandıra bilər. Amma ABŞ-nin burada siyasəti Donald Trampın verəcəyi qərardan asılıdır".
Analitikə görə, Avropa Rusiya qazından imtina etməklə, öz enerji müstəqilliyini də təmin etmiş oldu
: "Bu məsələ Rusiya və Avropa arasında dərin uçurum yaranmasına gətirib çıxardı. Ukraynanın belə bir qərar qəbul etməsi Vaşinqton və Londondan verilən təlimatlar əsasında həyata keçirildi. Rusiya çalışacaq ki, Türkiyə və Azərbaycan vasitəsilə qaz nəqlini reallaşdırsın. Amma Azərbaycanın texniki imkanları milyardlarla kubmetr Rusiya qazının daşınmasına imkan vermir. Azərbaycanın Rusiya qazının alışına getməsi risklidir. Qərb Azərbaycan qazına sanksiyalar tətbiq edə bilər. Azərbaycan üçün Avropanın qaz bazarında unikal şərait yaranıb. Vaxtı ilə "Qazprom" İtaliyada TAP qaz boru kəmərinin çəkilməsinin qarşısını almaq üçün "ekofəallardan" istifadə edirdi. Rusiya daima Azərbaycan qazının Avropaya ixracına qısqanclıqla yanaşırdı. Artıq Rusiyanın qazına blok qoyuldu".
