İqtisadi tərəfdaşlıq Çin məhsullarının Azərbaycan bazarında da mövqeyini gücləndirəcək
Bu gün ölkələr bir-biri ilə sıx iqtisadi əlaqələr qurmağa çalışır. Ticarət, sərmayə və nəqliyyat sahələrində əməkdaşlıq dövlətlərin inkişafı üçün böyük əhəmiyyət daşıyır. Xüsusilə də yerləşdiyi coğrafi mövqeyə görə bəzi ölkələr üçün bu əməkdaşlıqlar əlavə imkanlar yaradır. Yeni tərəfdaşlar tapmaq, mövcud əlaqələri gücləndirmək və qarşılıqlı faydalı layihələr həyata keçirmək bu sahədə atılan əsas addımlardandır. Belə əməkdaşlıqlar həm ölkələrin iqtisadiyyatına müsbət təsir göstərir, həm də gələcək inkişaf üçün vacib baza yaradır.
Azərbaycanla Çin arasında ticari-iqtisadi sahədə ikitərəfli əməkdaşlığın yüksək keyfiyyətli inkişafına töhfə vermək üçün investisiya əməkdaşlığı üzrə İşçi qrupun yaradılması barədə qərarın verilməsi də bu sahədə atılan mühüm addım oldu.
Sherg.az-a açıqlama verən iqtisadçı ekspert Ruslan Atakişiyev açıqlamasında Çin-Azərbaycan arasında iqtisadi cəhətdən atılan addımları yüksək qiymətləndirib:
"Azərbaycanla Çin Xalq Respublikası arasında son dövrlərdə bağlanmış iki tərəfli sazişlərin iki dövlət arasında iqtisadi əlaqələrin daha da dərinləşməsinə böyük faydası var.
Artıq Çin şirkətləri Azərbaycanın qeyri-neft sektorunda bir sıra investisiya layihələrinə vəsait yatırırlar. Həmçinin yeni layihələrdə də maraqlıdırlar. Bu, gözlənilən idi. Çünki Çinlə ABŞ arasında ticarət müharibəsinin kəskinləşməsi çərçivəsində Çinin başqa ölkələrlə iqtisadi əməkdaşlığının genişləndirilməsi planlaşdırılırdı.
Bunun fonunda hesab edirik ki, gələcəkdə bu, Azərbaycanın həm də Çin-Avropa iqtisadi əməkdaşlığı çərçivəsində logistika, tranzit yolu kimi mövqeyimizi daha da gücləndirəcək. Çünki orada imzalanan sazişlərdən biri də məhz bununla bağlı idi.
Digər məsələ isə qeyri-neft sektorunun inkişafıdır.
İqtisadi tərəfdaşlıq Çin məhsullarının Azərbaycan bazarında mövqeyinin daha da güclənməsinə gətirib çıxaracaq. Bu gün Çin dünyada istehlak baxımından da ilk üçlükdə olan bazardır".
Ekspert sonda Çin bazarının həcminin 30 trilyon dollardan daha çox qiymətləndirildiyini söyləyib.
O, Çin bazarına nüfuz edərək bu imkanlardan istifadə edib yerli istehsalçıların da ora məhsul ixracı məsələsi ətrafında ciddi fikirləşməyə ehtiyac olduğunu qeyd edib.
