Xalid Kərimli: Tramp da Mərkəzi Asiyanın enerji resurslarının Azərbaycan üzərindən beynəlxalq bazarlara çıxarılmasının strateji əhəmiyyətini dərk edir
ABŞ Prezidenti Donald Tramp 30-cu Yubiley Beynəlxalq Xəzər Neft və Qaz Sərgisi “Caspian Oil and Gas”, 13-cü Xəzər Beynəlxalq Energetika və Yaşıl Enerji Sərgisi “Caspian Power” və 30-cu Yubiley “Baku Energy Forum”a təbrik məktubu göndərib.
Məktubda deyilir:
“Əziz cənab Prezident.
Sizi və Azərbaycan xalqını səmimi-qəlbdən 30-cu Bakı Beynəlxalq Neft və Qaz Sərgisinin keçirilməsi münasibətilə təbrik edirəm. Bu, Azərbaycanın həqiqətən də regionda enerji sektorunda liderliyini və qlobal enerji təhlükəsizliyini təcəssüm etdirir. Otuz il ərzində iki millətimiz, iki xalqımız həqiqətən də enerji sərvətləri fonunda karbohidrogen sektorunda liderliyini nümayiş etdirmişdir. Həqiqətən də qlobal enerji ehtiyatlarının növbəti onillərlə qarşılanması baxımından da bu çox önəmlidir ki, hər bir xalqın resursları öz rifahına xidmət etsin.
ABŞ Azərbaycanla tərəfdaşlığını enerji sabitliyinin həyata keçirilməsinin mümkünlüyü istiqamətində də davam etdirmək əzmindədir. Biz bu önəmli sektorla birlikdə səylərimizi enerji müstəqilliyinin dayanıqlılığı və iqtisadi artım istiqamətində reallaşdıra bilərik. Bu gözəl tədbirlə bağlı bir daha təbriklərimi çatdırıram”.
İqtisadçı ekspert Xalid Kərimli Sherg.az-a deyib ki, ABŞ və Azərbaycan arasında enerji sahəsində davamlı və strateji əməkdaşlıq mövcuddur:
"Vaşinqton “Əsrin müqaviləsi”nin hazırlanmasında və Bakı-Tbilisi-Ceyhan (BTC) neft kəmərinin reallaşdırılmasında mühüm rol oynayıb. ABŞ bu layihələrə siyasi və strateji dəstək verərək Azərbaycanın enerji təhlükəsizliyinə töhfə göstərib. Bundan əlavə, Azərbaycan ABŞ-in əsas investorlarından biri olduğu beynəlxalq maliyyə institutları ilə əməkdaşlıq çərçivəsində bir sıra layihələrin maliyyələşdirilməsini təmin edib. Enerji sahəsində tərəfdaşlığın daha da genişləndirilməsi hər iki ölkə üçün faydalı və arzuolunandır. Digər tərəfdən, Azərbaycan NATO ilə əməkdaşlıq çərçivəsində təhlükəsizlik məsələlərində fəal iştirak edir. ABŞ isə Cənubi Qafqaz regionunda sülh, sabitlik və regional əməkdaşlığın gücləndirilməsində maraqlıdır. Donald Tramp da Mərkəzi Asiyanın enerji resurslarının Azərbaycan üzərindən beynəlxalq bazarlara çıxarılmasının strateji əhəmiyyətini dərk edir. Bu da Azərbaycanın regionda enerji və nəqliyyat qovşağı kimi mövqeyini bir daha təsdiqləyir".
