İşğaldan azad edilmiş ərazilərin ölkə iqtisadiyyatına reinteqrasiyası artıq nəticə verir
Bu ilin dövlət büdcəsində Bakı şəhəri üzrə gəlirlər 14 mlrd. 103 mln. manat nəzərdə tutulub.
Ölkənin ikinci böyük şəhəri olan Gəncə üzrə bu rəqəm 108 milyon 103 min manatdır.
Azərbaycanın işğaldan azad edilən əraziləri də bu ilin dövlət büdcəsinin gəlirlərində rol oynayacaq. Xankəndi üzrə 500 000, Ağdərə üzrə 300 000, Cəbrayıl üzrə 2 881 000, Füzuli üzrə 15 246 000, Xocavənd üzrə 1 285 000, Kəlbəcər üzrə 3 766 000, Qubadlı üzrə 7 105 000, Laçın üzrə 6 700 000 manat nəzərdə tutulub.
Şuşadan büdcəyə gözlənilən gəliri 4 121 000, Zəngilandan isə 3 056 000 manatdır.
Qeyd edək ki, respublikanın şəhər və rayonlar üzrə gəlirləri 15 500 000 000,0 manat proqnozlaşdırılıb.
Sözügedən proqnozları şərh edən millət vəkili Azər Badamov “Sherg.az"a açıqlamasında Azərbaycanın işğaldan azad edilmiş ərazilərinin ölkə iqtisadiyyatına reinteqrasiyasının artıq nəticə verdiyini vurğulayıb. Onun sözlərinə görə, keçmiş məcburi köçkünlər öz doğma yurdlarına qayıtmaqla yanaşı, həmin ərazilərin iqtisadi potensialı da dirçəlir və ölkə iqtisadiyyatına reinteqrasiyaa olunur:
“Bu baxımdan 2025-ci ilin dövlət büdcəsində işğaldan azad olunmuş ərazilər üzrə proqnozlaşdırılan gəlirlər də mövcud potensial nəzərə alınaraq hesablanıb. İşğaldan azad olunmuş ərazilərdə yeni müəssisələr fəaliyyətə başlayır. Həmin müəssisələrin vergi sisteminə cəlb olunması büdcə gəlirlərində iştirak imkanları yaradır. Belə ki, zaman keçdikcə yeni müəssisələr, iş yerləri formalaşacaq və həmin ərazilərdə əldə olunan gəlirlər də ölkənin büdcəsində daha böyük rəqəmlərlə əks olunacaqdır. Əslində, işğaldan azad olunmuş ərazilər yeraltı və yerüstü iqtisadi potensialla zəngindir. Həmin potensial ölkənin ümumi iqtisadiyyata reinteqrasiya olunması iqtisadiyyatın sabitliyini möhkəmləndirir”.
