Bu ilin yanvar-aprel ayında xarici ölkələrə gedən Azərbaycan vətəndaşlarının ümumi sayı ötən ilin eyni dövrü ilə müqayisədə 0,9 % artaraq 632,7 min nəfər olub.
"Report" bu barədə Dövlət Statistika Komitəsinə istinadən xəbər verir.
Məlumata görə, İrana gedən Azərbaycan vətəndaşlarının sayı 25,9 %, Gürcüstana gedənlərin sayı 20,4 % artıb, Türkiyəyə gedənlərin sayı 6,3 %, Rusiya Federasiyasına gedənlərin sayı isə 26,4 % azalıb.
Hesabat dövründə Azərbaycan vətəndaşlarının 36,1 %-i Türkiyəyə, 16,1 %-i Rusiyaya, 11,1 %-i Gürcüstana, 11 %-i İrana, 25,7 %-i digər ölkələrə səfər edib. Gedənlərin 66,9 %-ni kişilər, 33,1 %-ni qadınlar təşkil edib.
Mövzu ilə fikirlərini bölüşən turizm eksperti Cabir Dövlətzadə Sherg.az-a bildirib ki, statistika bir faizə yaxın bir artım göstərir:
“Ümumi stabil olan ölkələrə səyahət edən şəxslər xarici yerləri kəşf etməyə gedirlər. Bu da Azərbaycan vətəndaşları üçün müsbət bir haldır. Ən çox tərcih edilən ölkələrin başında isə Türkiyə gəlir. Çünki qardaş ölkədə həm mehmanxanalarda qala bilirlər, həm də öz evlərinə gedib qonaqlaya bilirlər. Bu da qardaş Türkiyə ilə bizim münasibətlərimizin ən üst səviyyədə olduğunu göstərir. Səfər edilən Avropa ölkələrində isə xüsusən Almaniya və İtaliya ön plana çıxır. Bu ölkələrə də Azərbaycan turistlərinin marağı yüksəkdir. Sözügedən ölkələr həm təhsil, həm biznes, həm də turistik yönlü səfərlər mövcuddur. Həmçinin iki ölkə ilə Azərbaycanın münasibətləri üst səviyyədədir. Buna görə də axın durmadan artır. Ümumiyyətlə Azərbaycan turistləri tarixi sevdikləri üçün onlar həm İtaliyada, həm də Almaniyada müəyyən tarixi yerlərə səfər edirlər. Bu da Azərbaycan turistlərinin yeni bir tendensiyasıdır".
Ekspert qeyd edib ki, ölkəyə gələn turistlərdə də müəyyən qədər artım görünür:
"Lakin qonşu Gürcüstanla müqayisədə bizə gələn turist sayında ciddi bir artım yoxdur. Hətta aprel ayında azalma görüldü. Səbəb isə Azərbaycanın turizm məhsulları Gürcüstan qədər geniş olmaması və ya əlimizdə olan turizm məhsullarını reklam edə bilməməyimizdir. Bu bizim üçün çətinlik yaradır. Digər tərəfdən muzeylərdə qiymətlərin həm yerli, həm də xarici müştərilərə qarşı artması onların qarşısında sədd çəkəcək. Turistlər əsasən qabaqcadan büdcəni və nə qədər pul xərclənəcəyini müəyyən edirlər. Qiymətlərin artması fonunda xüsusən ailəvi turistlərin belə məkanlara getməsində çətinlik yaranır. Mənim fikrimcə irəlidəki vaxtlarda türkdilli ölkələrdən gələn turistlərlə yerli turistlərin muzeylərdə eyni standarta salınması lazımdır. Bu da həm Türk Dövlətləri Təşkilatının bir mədəniyyət politikası olar, həm də türk əsilli vətəndaşların Azərbaycanın mədəniyyət yerlərini kəşf etməsinə yardım edər”.
