“Sosial paketlər bütün ölkə üzrə 5 milyon nəfəri əhatə edəcək səviyyədədir”
Prezident İlham Əliyevin tapşırığına əsasən növbəti sosial dəstək tədbiri kimi, avqust ayında sərt karantin rejimi tətbiq edilən 13 şəhər və rayon üzrə190 manat birdəfəlik ödəmə veriləcək. Ödəmə həmin şəhər və rayonlar üzrə 278 min nəfəri əhatə edəcək və bunun üçün 53 milyon manat ödəniləcək.
Ölkəmizdə “Məşğulluq və sosial rifaha dəstək” tədbirləri təqribən 5 milyon nəfəri əhatə edir. Dövlət sektoru 900 min nəfərin iş yeri və əmək haqqları qorunub. Özəl sektor üzrə isə 760 min nəfərin işsizliklə üzləşməsinin qarşısı alınıb. Eyni zamanda işsizlər və xüsusi karantin rejiminə görə gəlirini itirən qeyri-formal işləyən şəxslərə sosial yardımlar edilib. 190 manat birdəfəlik ödəmə üçün aprel-may aylarında ölkə üzrə 600 min şəxsə 225 milyon manat ödənilib.
Görülən tədbirlərə dair fikirlərini “Sherg.az”la bölüşən millət vəkili Müşfiq Məmmədli bildirib ki, pandemiya ilə mübarizə aparılan müddətdə Azərbaycanda əhalinin sağlamlığının qorunması istiqamətində dövlət tərəfindən bütün işlər görülür.
Parlamentarinin fikrincə, bu tədbirlərlə yanaşı əhalinin karantin rejimində əmək fəaliyyətindən təcrid olunması dövlətin hər zaman diqqətində olub:
“Cənab Prezident müxtəlif sosial paketlər formasında vətəndaşlarımıza dəstəyini davam etdirir. Sosial paketlər bütün ölkə üzrə 5 milyon nəfəri əhatə edəcək səviyyədədir. Avqust ayında müsbət dinamika nəticəsində xəstəliyin sayının azlması ilə yanaşı Operativ Qərargahın hazırladığı tədbirlər planına uyğun olaraq əhaliyə maddi dəstəyin davam etdirilməsi qərara alınıb. Cənab Prezident keçirdiyi son müşavirədə qeyd etdiyi kimi, 190 manatlıq birdəfəlik yardım avqust ayında da əhaliyə veriləcək. Bütün bunlar dövlətimizin iki əsas strateji vəzifəsinin olduğunu göstərir: İlk növbədə əhalinin sağlamlığı, ikinci növbədə isə sosial rifahın qorunması. Ölkə başçısının dediyi kimi bütün bunlar Azərbaycanın sosial dövlət modelində inkişafının göstəricisidir”.
Millət vəkili qeyd edib ki, parlamentin son sessiyasında aparılmış müzakirələrdə sosial təminat sturukturlarına üstünlük verilməsi istiqamətində qanun layihələri müzakirə olundu:
“Bu qanun layihələrinin qəbul olunması qənaət edilmiş vəsaitin yenidən səhiyyə sisteminə cəlb edilməsinə hesablanıb. Həmçinin sosial təminatla məşğul olan nazirliyin digər sturutkurlarının maddi vəsaitinin təmin olunması və büdcəsinin artırılması nəzərdə tutulur. Vətənaşların sağlamlığının ön planda olması və sosial rifahının yaxşılaşdırılması üçün görülən işlər dövlət qayğısının göstəricisidir”.
