Bu ilin mayında Azərbaycana 244 079 əcnəbi və vətəndaşlığı olmayan şəxs gəlib.
Bu barədə Dövlət Turizm Agentliyi məlumat yayıb.
Məlumata görə, bu, göstərici ötən ilin eyni dövrü ilə müqayisədə 4 808 nəfər və ya 2% çoxdur.
Bu ilin yanvar-may ayılarında isə Azərbaycana 979 963 əcnəbi və vətəndaşlığı olmayan şəxs səfər edib ki, bu da ötən ilin eyni dövrü ilə müqayisədə 14 408 nəfər və ya 1.5% çoxdur.
Cari ilin may ayında Azərbaycana ən çox turist Rusiyadan gəlib. Sözügedən ölkədən Azərbaycana səfər edənlərin sayı 62 809 nəfər olub ki, bu da 1 il əvvələ nisbətən 9% azdır. Siyahıda ikinci pillədə 41 299 nəfər (illik müqayisədə 10% artım) göstərici ilə Türkiyə, üçüncü yerdə isə 23 326 nəfər (illik müqayisədə 21% artım) göstərici ilə Hindistan qərarlaşıb.
Turizm eksperti Cabir Dövlətzadə Sherg.az-a bildirib ki, may ayı üçün gələn turist sayı keçən ilin dövrünə əsasən çoxdur:
“Azərbaycanda göstərici hər ay artır. Çünki sezon başlayır. Dövlət Turizm Agentliyi ayın 13-də tədbir keçirərək yay turizminin başladığını elan etdi. Şahdağ Turizm Mərkəzi, xüsusən həm yay, həm də qışda turistlər üçün məqsədəuyğundur. Orada olan otellərin sayının çoxluğu bölgələrə gedən turistlərin daha çox rəğbətini cəlb edir və Bakıdan sonra gedilən məkandır. Bakıdan gələn turistlərdə birinci sırada Rusiyadır. Lakin keçən ilə baxanda ilin ilk beş ayında rusiyadan gələn turistlərdə 9 faiz azalma var. İkinci yeri türkiyə təşkil edir və keçən ilki dövrlə müqayisədə 10 faizlik artım görünür. Ən çox artım 20 faizin üstündə hindistanlılar olaraq qeyd olunub. Xüsusən pakistan və hindistan arasında olan müharibə müəyyən rezervasiyaların ləğvinə gətirib çıxartdı. Biz gözləyirik ki, iyun, iyul, avqust aylarında Hindistandan gələn turistlər daha da artsın. Bölgələr üzərində isə ən çox yeri Qəbələ, Quba tutur. Daha sonra bunu Şəki təqib edir.
