Ciddi fəsadları həkim izah edir...
İnsanların bir çoxu avtomobildə atışdırmalıqlara adət edib. Bəzisi hansısa tədbirə, bəzisi görüşə tələsərkən, bəzən idmandan sonra, bəzən də uzun səfər zamanı avtomobildə, sükan arxasındaca nahar edir. Ancaq mütəxəssislərin xəbərdarlıqları “yemək bir az gözləsin”, deməyə vadar edəcək.
“Sherg.az” “tr.mashable.com”a istinadən xəbər verir ki, mütəxəssislər avtomobildə nahar etməyin sağlamlığa ciddi təsirləri ilə bağlı narahatlıqlarını bildirir. Həkim Shivram Sink sükan arxasında, avtomobil salonunda nahar etməyin sağlam olmadığını vurğulayıb və bunun qida zəhərlənməsi riskini də artıra biləcəyi barədə xəbərdarlıq edib. WINIT Klinikasında çalışan S.Sink "maşında nahar etmək və ya qidanı, ərzağı avtomobilin içində saxlamaq çox vaxt qırıntılara və ya qida dağılmasına səbəb ola bilər. Bunlar yaxşıca təmizlənməsə, orada bakteriya, kif yaranmasına və ya digər zərərvericilərin əmələ gəlməsinə səbəb ola bilər” deyib. Bu vəziyyət təkcə qidalanma baxımından deyil, sağlamlıq və gigiyena baxımından da qeyri-sağlam bir mühit yarada bilər. Sürücülər qidalanmaq istəyirsə, bunu yeməkdən daha yaxşı həzz ala biləcəyi və daha uyğun şəkildə saxlaya biləcəyi mühitdə etməlidirlər. Mütəxəssislər əldə edilən məlumatlara əsaslanaraq vurğulayırlar ki, əgər avtomobildə yemək yeyəcəksinizsə, avtomobilin çox yaxşı təmizləndiyinə əmin olmalısınız. Eyni zamanda S.Sink deyib ki, avtomobildə nahar etmək yoluxucu xəstəliklər riskini artırır. "Avtomobilinizdə yemək saxlamaq və nahar etmək bakteriya artımının artmasıyla nəticələnəcək ki, bu da bir sıra sağlamlıq problemlərinə səbəb ola bilər" deyən həkim "maşınlar yayda içəridə çox isti, qışda isə çox soyuq ola bilər və bu ekstremal şərtlər sağlamlıq üçün mənfi nəticələrə səbəb ola bilər", vurğulayıb. Salmonella və Listeria kimi bəzi bakteriyalar, tipik bir qapalı avtomobildə tapılan 40 ilə 60 dərəcə Selsi aralığında ideal böyümə temperaturlarına malikdir. Bu vəziyyət qidadan yoluxucu xəstəliklərin riskini artırır. Əvvəlki araşdırmalar avtomobillərdə bakteriya sayının çox olduğu bir neçə sahəni aşkar etmişdi. Bakteriyalar daha çox avtomobilin baqajında olur, burada təxminən 1500 müxtəlif bakteriya aşkar edilir. Sürücü oturacağı, ötürücü dəstək, alət paneli və sükan da xeyli miqdarda bakterial yük daşıyır. Lakin bu araşdırma satılmağı gözləyən işlənmiş avtomobillər üzərində aparılıb. Mümkündür ki, müntəzəm olaraq istifadə edilən avtomobillərdə bakteriya sayı daha yüksək olsun.
Mütəxəssislərin fikrincə, avtomobillərdə ən çox rast gəlinən bakteriyalar bağırsaqlarımızda yaşayan E.coli-dir. E.coli mahiyyət etibarilə zərərsizdir, lakin bəzi hallarda qida zəhərlənməsinə səbəb ola bilər. Avtomobildə başqa gizli bakteriya növləri də ola bilər; Staphylococcus epidermidis və bəzi Staphylococcus aureus ştammı da sınaqdan keçirilmiş əksər avtomobil səthlərində ən çox yayılmış bakteriyalar olub. Mütəxəssislər bildirir ki, xüsusilə də avtomobildə yemək yeyirsinizsə, avtomobilinizi mütəmadi olaraq təmizləməlisiniz. Avtomobilin gigiyenik təmizlikdə saxlanması avtomobildə kif və xəstəliklərin yaranmasının qarşısını almaq üçün çox vacibdir. Avtomobili müntəzəm olaraq, xüsusən də yeməkdən sonra təmizləmək çox vacibdir. Daşınan tozsoran, antimikrob salfetlər və dezodorasiya spreylərindən istifadə sürücülərə təmiz və təhlükəsiz sürücülük mühitini saxlamağa kömək edə bilər.
