Sivasda bir fermer 51 kiloqram çəkidə nəhəng balqabaq yetişdirib.
Sherg.az xəbər verir ki, may ayının ortalarında əkilən balqabaq oktyabr ayında yığımı həyata keçirilib. Kilosu 25 lirədən satışa çıxarılan balqabaq, tarlada yığılarkən iki nəfərin köməyi ilə daşınıb.
Adətən balqabaqların çəkisi 8–10 kiloqram arasında dəyişir, lakin bu dəfə yetişdirilən 51 kiloqramlıq nəhəng balqabaq ölçüsü ilə diqqət çəkib. Satış üçün piştaxtada sərgilənən bu balqabaq ətrafdakılardan da böyük maraq görüb. Şəhər sakinləri belə böyüklükdə bir balqabağı ilk dəfə gördüklərini bildirərək onunla xatirə şəkli çəkdiriblər.
Nəhəng balqabağı yetişdirən fermer Mehmet Önk deyib:
“Mən illərdir kənd təsərrüfatı ilə məşğulam. Bu balqabağı əmioğlumla birgə yetişdirdik. Bunun üçün torpağın yeri çox önəmlidir. Mayın ortasında əkirik, oktyabrın ortasında da yığırıq. Bu balqabağın digərindən fərqi ondadır ki, ata toxumundan yetişdirilib. Tam 51 kiloqram gəlir. Tarlada yığarkən və motora yükləyərkən iki nəfər güclə qaldırdıq. Kilosunu 25 lirədən satdıq. Daha əvvəl də böyük balqabaq yetişdirmişdim, amma o 37 kilo gəlmişdi. Belə böyüyünə isə heç rast gəlməmişik. Ona sarılmaq istəyəndə iki qolum ancaq çatır,”- deyə bildirib.
Nəhəng balqabaqla şəkil çəkdirən Bekir Çınar isə deyib:
“Bu balqabağı yoldan keçərkən gördüm, çox təəccübləndim. Qardaşımızı uzun illərdir tanıyıram, çox balqabaq yemişik, amma bu boydakı balqabağı ilk dəfə görürük. Ona belə bir məhsul yetişdirdiyi üçün təşəkkür edirəm. Bu balqabağı Sivasımıza və ölkəmizə tanıtdığı üçün minnətdaram. Uğurlarının davamını Allahdan arzulayıram.”
