İnsan genetikasında “yadplanetli mənşəli əlavələr” ola biləcəyi iddiası elmi ictimaiyyətdə mübahisə yaradıb. Yeni araşdırmanın ilkin nəticələrinə görə, bəzi fərdlərin DNT-sində valideynlərdən gəlməyən müəmmalı genetik ardıcıllıqlar aşkar edilib.
Sherg.az xəbər verir ki, İnsan DNT-sində “yadplanetli mənşəli genetik əlavələr” tapıldığını irəli sürən yeni tədqiqat, elmi dairələrdə ciddi müzakirələrə səbəb olub.
ABŞ mərkəzli "DNA Resonance Research Foundation"-un qurucusu və baş direktoru Dr. Maks Rempel, milyonlarla insanın genetik quruluşunda valideynlərdən miras alınmayan “böyük DNT zəncirləri” müəyyən etdiklərini bildirib.
Hələ elmi icmal mərhələsindən keçməyən araşdırmada 1000 Genom Layihəsindən seçilən 581 tam ailə analiz edilib.
Rempel bildirib ki, 11 ailədə valideynlərlə uyğun gəlməyən geniş genetik bölgələr aşkarlanıb və bu bölgələrdə 348 “valideynə aid olmayan” variant yer alır.
O qeyd edib ki, bu variantlardan bəziləri 1990-cı ildən əvvəl doğulan uşaqlarda müşahidə olunub. Buna görə də müasir gen redaktəsi texnologiyalarının təsiri ehtimalı istisna edilib.
Kimlərdə “yadplanetli DNT” ola bilər?
Rempel deyib:
“Bu tapıntılar ilkin araşdırma xarakteri daşıyır. Daha keyfiyyətli məlumat bazalarına ehtiyac var və onlara çıxış üçün rəsmi icazə tələb olunur. Bu isə vaxt və resurs tələb edir.”
Ancaq əgər nəticələr təsdiqlənsə, insanların hansı fərdlərin “yadplanetli DNT” daşıdığını müəyyənləşdirmək və “hibridləri” tanımaq mümkün ola bilər.
Bu hipotez uzun illərdir UFO həvəskarları arasında dolaşan “insan-yadplanetli hibrid” nəzəriyyələrinə də istinad edir.
Məsələn, Peruda tapılan “Nazka mumiyaları” ilə bağlı iddialar, insan və yadplanetli DNT-sinin birlikdə ola biləcəyini irəli sürür. Rempelin tədqiqatı doğrulanarsa, bu cür iddialara “elmi əsas” gətirə bilər.
Telepatiya və yeni qabiliyyətlər
Rempelin fikrincə, valideyn və uşaqların DNT-si yüksək dəqiqlikli metodlarla təhlil edilərsə, “yadplanetli əlavələr” açıq şəkildə müəyyən ediləcək.
Beləcə, insanların telepatiya kimi qeyri-adi qabiliyyətlər inkişaf etdirmiş ola biləcəyi belə sübut edilə bilər.
Tədqiqatçı əlavə edib ki, mövcud DNT məlumat bazalarının çoxu köhnə hüceyrə kulturlarından əldə olunub və bu kulturlama prosesi genetik dəyişikliklərə səbəb ola bilər. Buna görə də bu məlumatların “sübut” kimi istifadəsi düzgün deyil.
Etik suallar gündəmdə
Əgər doğrudan da insanlarda yadplanetli DNT aşkarlanarsa, bu fərdlərin hüquqlarının necə qorunacağı sualı ortaya çıxacaq.
Rempel bildirib ki, autizm, diqqət çatışmazlığı (ADHD) və Asperger sindromu kimi neyroçeşidlilik göstərən şəxslərdə bu əlavələrin daha çox görülə biləcəyini ehtimal edir, lakin bunun hələlik tamamilə fərziyyə olduğunu vurğulayıb.
Mütəxəssislər yaxın gələcəkdə könüllü ailələrdən DNT nümunələri toplayaraq daha yüksək dəqiqlikli analizlər aparmağı və araşdırmanı genişləndirməyi planlaşdırırlar.
