Kaliforniya Universitetinin alimlərinin apardığı araşdırmaya görə, cütlüklər bir-biri ilə daha çox qeybət etdikcə, onlar daha xoşbəxt və münasibətləri davamlı olur.
Axşam.az xəbər verir ki, bu barədə "PsyPost" nəşri məlumat yayıb.
Tədqiqatda azı bir ildir birlikdə yaşayan və uzunmüddətli münasibətdə olan 76 cütlük – ümumilikdə 152 nəfər iştirak edib. Hər iştirakçı gündəlik həyatlarını qeyd edən portativ diktofon daşıyıb və nəticədə alimlər təxminən 100 min audioyazı toplayaraq təhlil ediblər.
Araşdırmanın nəticələrinə əsasən, qeybət cütlüklərin gündəlik söhbətlərinin ayrılmaz hissəsinə çevrilib. Orta hesabla cütlüklər gündə təxminən 38 dəqiqəni qeybətə sərf ediblər. Bir-biri ilə daha çox qeybət edən cütlüklər, münasibətlərində daha yüksək xoşbəxtlik səviyyəsi və keyfiyyətli əlaqə olduğunu bildiriblər.
Tədqiqatın həmmüəllifləri bu nəticəni belə izah ediblər:
“Qeybət birgə görülən fəaliyyət olduğuna görə, tərəfdaşlar arasında "biz eyni tərəfdəyik" hissini gücləndirə bilər. Bu da bağlılıq, inam və münasibətlərin digər müsbət cəhətlərini artırır.”
