Sinqapurun dövlətə məxsus investisiya fondu insan sağlamlığına zərərli əbədi kimyəvi maddələri (forever chemicals) aradan qaldırmaq üçün süni intellektdən (AI) istifadə edən Kembric startapına milyonlarla dollar sərmayə qoymaq üçün danışıqlar aparır.
AZƏRTAC “Telegraph”a istinadla xəbər verir ki, Temasek fondu Böyük Britaniyanın qabaqcıl AI alətlərindən istifadə edərək yeni maddələrin kəşfini sürətləndirən və bu vasitə ilə insan tərəfindən istehsal olunmuş, ətraf mühitdə uzun müddət qalaraq toksik təsir göstərə bilən kimyəvi maddələri parçalaya biləcək molekullar yaradan “CuspAI” şirkətində pay almağa hazırlaşır.
“CuspAI” cəmi bir il əvvəl keçmiş “Google AI” tədqiqatçısı Çad Edvards və professor Maks Vellinq tərəfindən təsis olunub. Şirkətin hazırda 100 milyon ABŞ dolları həcmində yeni investisiya toplamağa yaxın olduğu bildirilir. Bu məbləğ şirkəti Birləşmiş Krallığın ən çox maliyyələşdirilən AI startaplarından birinə çevirəcək.
Şirkətin texnologiyası yeni materialların kəşfini illərlə davam edən prosesdən cəmi bir neçə həftəyə endirməyi hədəfləyir. Yeni materiallar üçün axtarış sistemi adlandırılan bu platforma süni intellektdəki irəliləyişlərdən istifadə edərək, innovativ birləşmələrin tapılmasını xeyli sürətləndirir. Texnologiya, həmçinin karbon tutma və saxlanması, daha səmərəli batareyalar və yüksək gücə malik yarımkeçiricilər üçün ucuz materialların hazırlanmasını da sürətləndirə bilər.
