“Bu xəstəlikdən əziyyət çəkənlər var ki, vəziyyətləri çox pisdir, acınacaqlıdır”
“Pandemiya tam qurtarmalıdır. Sonra hamı kimi işimizə qayıdarıq”
Son günlər sosial şəbəkələri şou əhlinin etiraz paylaşımları “bəzəyir”. Onlar xüsusi karantin rejiminin uzadılmasına, toylara qoyulan qadağaya üsyan edir, maddi sıxıntılarından söz açırlar. Şübhəsiz hər zaman lüks həyatları ilə diqqət çəkən, cəmiyyətin varlı təbəqəsi olaraq bilinən müğənnilərin giley-güzarı insanların qəzəbinə tuş gəlir. İndiki gərgin vəziyyətdə minlərlə yoxsul ailənin evində bir quru çörək belə yoxkən, onlar bahalı maşınlarından xalqa səslənirlər. Sağlamlığımız naminə görülən tədbirlərə qarşı çıxırlar. Buna müğənillər – Niyam Salami, Nura Suri, Səidə Sultan və başqalarını misal göstərmək olar.
Bəs gəlin görək digər sənət adamları həmkarlarının davranışları haqqında nə düşünür?
Sualımıza cavab tapmaq məqsədilə sevilən xanəndə, əməkdar artist Babək Niftəliyevlə əlaqə saxladıq. Sənətçi “Sherg.az”la fikirlərini bölüşdü:
“Cənab Prezidentimiz pandemiya ilə bağlı ciddi tədbirlər görür. Virusa qarşı vuruşanlar – həkim, polis və media işçiləri böyük əziyyətlər çəkirlər. Hələlik qaydalara əməl etməliyik, çünki bizim xeyrimizədir. Ölkə başçımız və dövlətimiz nə deyirsə, onunla getməliyik. Etiraz etməyin yeri yoxdur. Bu xəstəlikdən əziyyət çəkənlər var ki, vəziyyətləri çox pisdir, acınacaqlıdır. İnfeksiya bir nəfərdən başqalarına yoluxa bilir. Ona görə də belə şeylərə yol vermək olmaz. Pandemiya tam qurtarmalıdır. Sonra hamı kimi işimizə qayıdarıq. Biz də neçə aydır işimizdən qalmışıq”.
