ABŞ-da onlayn platformaların məhkəmə prosesini sadələşdirən qanun layihəsi təklif olunub. Yeni qanun layihəsinə əsasən bu ölkədə sosial şəbəkələrin məhkəmə prosesi sadələşdirilir. Əvvəlki qanunlara əsasən hər hansı istifadəçinin sosial şəbəkələrdə və onlayn platformalarda təhqir və zərərli paylaşıma görə məhkəmə şikayətləri tam təmin olunmurdu. Məhkəmə bu şikayətləri qısa müddətdə ləğv edir və ya tam təmin etmirdi.
Yeni qaydalarda onlayn platformaların saxta və zərərli reklamlara görə də məsuliyyət daşıyacağı göstərilir. Sözügedən qanun layihəsi qəbul edilərsə, "Facebook", "Twitter","Google", "YouTube" kimi sosial şəbəkələri və "Amazon", "Etsy" kimi e-ticarət saytları da daxil olmaqla bir sıra platformalara qarşı qərarlar sərtləşdiriləcək. Onlar qaydalara daha ciddi əməl etməli olacaqlar, əks təqdirdə qanuna uyğun olaraq cəzalandırlacaqlar.
Qeyd edək ki, zaman-zaman Azərbaycanda da onlayn platformanın qanunla tənzimlənməsi məsələsi gündəmə gəlir. Bunun hansı formada tətbiq edilməsi müəyyən müzakirələrə yol açır. Maraqlıdır, ölkəmizdə sosial şəbəkələrin tənzimlənməsi realdırmı?
Sualmızı cavablandıran media hüquqşünası Ələsgər Məmmədli “Sherg.az”a bildirib ki, reklama verilən müəyyən tələblər var. Reklamın məzmununda bir sıra elementlər, o cümlədən onun nifrəti, psixotrop maddələri təbliğ etməməsi və s. dayanır:
“Yəni bu, təbii haldır. Əslində Azərbaycanda Reklam haqqında Qanunda da həmin müddəlar öz əksini tapıb. Odur ki, televiziya və küçə reklamına tətbiq olunan məhdudiyyətlər sosial şəbəkələrdə də öz əksini tapa bilər”.
