Baş nazir Əli Əsədov Laçın Hava Limanına beynəlxalq status verilməsi barədə sərəncam imzalayıb.
Sherg.az xəbər verir ki, sərəncama əsasən, Laçın rayonunda tikintisi başa çatdırılmış və beynəlxalq uçuşların həyata keçirilməsi üçün müvafiq standartlara cavab verən Laçın Hava Limanı bu gündən etibarən rəsmi olaraq beynəlxalq hava limanı statusu daşıyacaq.
Qərar Azərbaycan Respublikası Konstitusiyasının 119-cu maddəsinin səkkizinci abzasına əsasən, Rəqəmsal İnkişaf və Nəqliyyat Nazirliyi, Fövqəladə Hallar Nazirliyi və “Azərbaycan Hava Yolları” Qapalı Səhmdar Cəmiyyətinin razılaşdırılmış təklifləri nəzərə alınaraq qəbul edilib.
Sənədə əsasən, Xarici İşlər Nazirliyi Laçın Hava Limanına beynəlxalq status verilməsi barədə müvafiq beynəlxalq təşkilatlara rəsmi məlumat təqdim edəcək.
Sərəncam imzalandığı gündən qüvvəyə minir.
