Yaxın günlərdə güclü zəlzələ olmayacaq
Fevralın 27-28-də Azərbaycanda bir neçə zəif maqnitudalı zəlzələ qeydə alınıb.
Belə ki, ötən gün İsmayıllı rayonunda 3,3 maqnitudalı yeraltı təkan baş verib, ocağı 46 km dərinlikdə yerləşib. Həmin gün Xəzər dənizində də 3,1 maqnitudalı zəlzələ qeydə alınıb.
Fevralın 28-də isə yenə İsmayıllı rayonunda zəlzələ baş verib - yerli vaxtla saat 07:49-da qeydə alınan təkanların maqnitudası 3 olub, ocağı isə 3 km dərinlikdə yerləşib.
Zəlzələlər hiss olunmayıb və hər hansı fəsad törətməyib.
Geologiya-mineralogiya elmləri doktoru, Respublika Seysmoloji Xidmət Mərkəzinin baş direktoru Qurban Yetirmişli “Sherg.az”a bildirib ki, dünən gecə 21:00 dan bu gün səhər saat 09:00 a qədər Respublika içərisində 36 təkan olub:
“Onlardan iki dənəsinin maqnitudası üçdən yuxarıdır. Bunların heç biri problem törədən deyil. Nə İsmayıllıda, nə də ki, Xəzər dənizində baş verən zəlzələ hiss olunmayıb. Həmçinin bu dağıdıcı zəlzələ ehtimalından xəbər vermir. Ümumiyyətlə zəlzələlərin maqnitudası 3 və 3.3 olduqda qorxulu və ya dağıdıcı təsirə səbəb olmur. Belə zəlzələlər kiçik təkanlar olaraq hiss edilsə də, insanların gündəlik həyatına ciddi təsir etməz. Çox vaxt bu cür zəlzələlər yalnız yerli sakinlər tərəfindən hiss olunur, amma böyük zərər vermir. Yaxın günlərdə güclü zəlzələ olmayacaq”.
