Azərbaycana heç vaxt bu jest göstərilməyib
Tehrandakı İran qülləsi erməni bayrağına büründü
İrandakı məşhur "Azadi qülləsi" Ermənistanın Müstəqillik Günü şərəfinə Ermənistan bayrağının rənglərində işıqlandırılıb. Bundan əlavə, Ermənistanın dövlət himni də səsləndirilib. Qeyd edək ki, İranda Novruzqabağı şənliklər zamanı da "Azadi qülləsi" Ermənistan bayrağı və təbrik mesajı ilə işıqlandırılıb. Ermənistanın rəsmi bayramlarından biri olan Müstəqillik Günü hər il sentyabrın 21-də qeyd olunur. Ən böyük dəstəkçisi İran da bu özəl günü unutmur.
Siyasi şərhçi Bəybala Mirzəyev Sherg.az-a açıqlamasında bunu mollaların ermənilərdən artıq erməniçilik etmək cəhdi kimi qiymətləndirib. Ekspert vurğulayıb ki, fars-molla rejimi bu addımı ilə ermənilərə "dostluq və qardaşlıq" jesti edib:
"Lakin maraqlıdır ki, İrəvanın özündə mərkəzi teleqüllənin Ermənistan bayrağının rəngləri ilə işıqlandırılmasına heç bir təşəbbüs göstərilməyib. Həmçinin, əvvəlki illərdən fərqli olaraq bu dəfə Ermənistan hökuməti sentyabrın 21-də "Yerablur" məzarlığını da ziyarət etməyib. Bu da onunla bağlıdır ki, Paşinyan artıq erməni ictimaiyyətində revanşist hisslərin baş qaldırmasına rəvac verə biləcək heç bir tədbirin keçirilməsini istəmir. O, erməni cəmiyyətini sülhə hazırlamağa çalışır. 2023-cü ilin sentyabrında Qarabağı könüllü tərk edən ermənilərə humanitar yardım paylayan və "Rusiya sizinlədir!" şüarını səsləndirməklə ermənilər arasında separatçılığı yenidən körükləməyə çalışan Rusiyadan nümunə götürən İranın molla rejimi Tehranın simvolu olan qülləni erməni bayrağının rəngləri ilə işıqlandırmaqla yersiz canıyananlıq göstərir. Yeri gəlmişkən, molla rejimi heç vaxt bizə qarşı eyni jesti göstərməyib. "Azadi Qülləsi" heç vaxt Azərbaycan bayrağına bürünməyib".
