Türkiyə Qətərlə hərbi və hərbi-texniki sahədə, eləcə də enerji sektorunda əməkdaşlığı daha da inkişaf etdirməyi hədəfləyir.
Teleqraf xəbər verir ki, bunu Türkiyə Prezidenti Rəcəb Tayyib Ərdoğan əmirliyə səfəri zamanı Qətər əmiri Şeyx Təmim bin Həməd əl-Tani ilə görüşündə deyib.
Görüşdə ikitərəfli münasibətlər, regional və qlobal məsələlər müzakirə edilib. Prezident Ərdoğan Türkiyə ilə Qətər arasında hərbi, müdafiə sənayesi, enerji, ticarət və investisiya daxil olmaqla bir çox sahədə əlaqələrin daha da inkişaf etdirilməsi arzusunu ifadə edib.
Ərdoğan həmçinin bildirib ki, Türkiyə ilə Qətər arasında strateji tərəfdaşlıq regional və qlobal sabitliyə mühüm töhfə verir.
Qəzza zolağındakı vəziyyətdən danışan Türkiyə prezidenti qeyd edib ki, iki dövlətli həll Fələstin-İsrail münaqişəsindən yeganə çıxış yoludur. O, ölkəsinin bundan sonra da bu məqsədlə çalışacağını vurğulayıb.
Ərdoğanın sözlərinə görə, Türkiyə Suriyada yenidənqurma prosesinə dəstək verəcək və bu çərçivədə Qətərlə enerji, nəqliyyat və humanitar yardım kimi sahələrdə əməkdaşlıq edəcək.
