Ermənistanın son illərdə həyata keçirdiyi silahlanma prosesləri regionda təhlükəsizlik və gərginlik mövzularında yeni suallar doğurur. Rəsmi İrəvanın, son iki ildə hücum silahları almağa yönəlməsi, bu silahların potensial olaraq Azərbaycan ərazilərinə zərbə vurma qabiliyyətinə malik olması, hər iki ölkə arasında yeni bir münaqişənin baş verməsi ehtimalını artırır. Ermənistanın silahlanma strategiyası, beynəlxalq aləmdə müvafiq tərəfdaşlarla bağlanan müqavilələr və alınan texnikalarla möhkəmlənir. Bu inkişaflar, xüsusən də yeni bir münaqişə ehtimalını gündəmə gətirir.
Mövzu ilə bağlı Sherg.az-a açıqlama verən hərbi ekspert Elxan Şıxəliyev Ermənistanın silahlanma prosesindən və əldə etdiyi silahlardan danışıb:
"Ermənistan Silahlı Qüvvələri, 44 günlük müharibənin bitməsindən sonra silahlanma prosesini sürətləndirib. Bu prosesə "diversifikasiya" adı verilib. Ermənistan yalnız Sovet İttifaqından qalmış və ya Rusiyadan alınmış silahlarla deyil, həm də digər ölkələrin müdafiə sənayesi şirkətlərinin istehsalı olan texnikaları almağa başlayıb. İlkin mərhələdə, Ermənistan bu silahlanmanı özünün təhlükəsizliyini təmin etmək üçün müdafiə silahları və müdafiə qabiliyyətinə təsir edəcək silahlar adı altında həyata keçirib. Lakin son iki ildə rəsmi İrəvan, bir çox istiqamətdən, öz ərazisindən Azərbaycanın ərazilərinə təhlükə yaradacaq hücum silahları almağa başlayıb. Hücum silahları dedikdə isə, əsasən, məsafədən raket sistemləri, ən azından 50-500 km məsafə dərinliyində zərbə endirə bilən raketlər, artileriya qurğuları və toplar nəzərdə tutulur.
Ermənistan bu silahlanmanı əsasən iki istiqamətdən həyata keçirir. Birinci istiqamət Fransadan SEZAR özüyeriyən top sistemlərinin alınmasıdır. Bu qurğular Ermənistan üçün müdafiə silahları sayılmır, çünki 18-20 km dərinliyindəki Azərbaycan ərazilərinə zərbələr endirə bilərlər. Ardınca, Hindistanla bağlanmış hərbi müqavilələr əsasında, Akaş zenit raket kompleksləri və Pralay raket sistemlərinin alınması ilə bağlı müzakirələr davam edir. Bu günlərdə, Suren Papikyanın Hindistanda olduğu və xüsusilə hava texnikaları sərgisində iştirak etdiyi bildirilib. Eyni zamanda, Hindistandan alınan raketlərin Ermənistanın təyyarələrinə uyğunlaşdırılması və bu raketlərin gələcəkdə Azərbaycan ərazilərinə buraxılması məsələləri müzakirə olunur".
Ekspert rəsmi İrəvanın hərbi büdcəsini artırdığına da diqqət çəkib:
"Ermənistan həmçinin Fransadan, Hindistandan və Yunanıstandan digər hərbi texnikaların alınmasını da müzakirə edir. 2024-cü ildə rəsmi İrəvan, hərbi büdcəsini maksimum həddə çatdırıb. 1,6 milyard ABŞ dolları həcmində olan bu büdcə, əvvəllər Ermənistan silahlı qüvvələrində mövcud olmayan bir məbləğdir. Əslində, bu büdcə müdafiə məqsədli deyil, ən çox, yeni bir münaqişə zamanı istifadə oluna biləcək artileriya qurğularının və raket sistemlərinin alınmasına yönəldilib. Nəticə etibarilə, Ermənistanın Azərbaycana qarşı silahlanma prosesində artım müşahidə olunur. Rusiya istehsalı olan hərbi texnikaların Ermənistana daxil olması, Fransanın Ermənistanı silahlandırmaq təşviqi və Hindistanla davamlı müqavilələr, rəsmi İrəvanın Azərbaycanla sülh sazişi gözləntilərinə baxmayaraq, təhlükəli silahların arsenalını artırmağa çalışdığını göstərir".
Hərbi ekspert sonda silahlandırılan Ermənistanın yeni bir münaqişəyə hazırlıq məqsədi güddüyünü vurğulayıb.
