Gürcüstan hökuməti müharibə ilə əlaqədar ölkəyə gələn və Gürcüstanda sığınacaq alan Ukrayna vətəndaşları ilə bağlı yeni qərarlar qəbul edib.
AZƏRTAC xəbər verir ki, yeni qərara əsasən Ukrayna vətəndaşlarının Gürcüstanda vizasız qalma müddəti 3 ildən 1 ilə endirilib.
Yeni qərarda deyilir ki, Ukrayna vətəndaşlarının Gürcüstana vizasız daxil olma və burada tam 1 il müddətində qalma hüququ var. 2025-ci il fevralın 24-dək Gürcüstana daxil olmuş və burada olan Ukrayna vətəndaşlarının qalma müddəti 2026-cı il fevralın 24-dək uzadılır.
Qeyd edək ki, 2024-cü il aprelin 23-də Baş nazirin qərarına əsasən, Ukrayna vətəndaşları üçün Gürcüstana vizasız daxil olma və qalma müddəti 3 ilə qədər artırılmışdı. Rusiya ilə Ukrayna arasında müharibə başlamamışdan əvvəl isə ukraynalılar Gürcüstanda 1 il müddətində vizasız qala bilirdilər.
Gürcüstan Baş nazirinin imzaladığı digər qərara əsasən isə Ukraynada davam edən hərbi əməliyyatlara görə, Gürcüstana daxil olmuş Ukrayna vətəndaşlarına və Ukraynada daimi yaşamaq hüququ olan ailə başına 300 lari, adambaşına isə 45 lari məbləğində yardım göstəriləcək.
