İran Xarici İşlər Nazirliyinin sözçüsü İsmayıl Bəqayi Körfəz Əməkdaşlıq Şurası və Avropa İttifaqının xarici işlər nazirlərinin iclasının birgə bəyanatına cavab verib.
Teleqraf xəbər verir ki, o, Birləşmiş Ərəb Əmirliklərinin (BƏƏ) körfəzdəki üç ada ilə bağlı açıqlamasına da etiraz edib.
“İranın Böyük Tunb, Kiçik Tunb və Əbu Musa adaları üzərindəki suverenliyi mübahisəsiz və daimidir”, - İsmayıl Bəqayi bildirib.
Diplomat Avropa ölkələrini regionda aranı qatmaqda ittiham edərək, onlara İranın və körfəz regionunun işlərinə dağıdıcı və bölücü müdaxilələrinə qarşı xəbərdarlıq edib.
Xatırladaq ki, İran və BƏƏ uzun illərdir Hörmüz boğazına yaxınlığı və regiondakı neft potensialına görə strateji mövqedə olan Əbu Musa, Böyük Tunb və Kiçik Tunb adaları üzərində mübahisə edir. Adalar 1971-ci ilə qədər İngiltərənin nəzarətində olub. 1971-ci ilin noyabrında İngiltərə adaları BƏƏ-yə təhvil verərək geri çəkildikdən sonra İran əraziləri ələ keçirib. BƏƏ adalarda hərbi qüvvələrini yerləşdirən İranı işğalçı adlandırır.
