Türkmənistan Azərbaycanla münasibətləri riskə atmaz
Ermənistan Prezidenti Vaaqn Xaçaturyan Türkmənistanda səfərdədir. O, səfər çərçivəsində İranın vitse-prezidenti Məhəmmədrza Arif ilə görüşüb. Tərəflər görüş zamanı iki ölkə arasında mehriban qonşuluq və çoxsahəli əməkdaşlığın davamlı şəkildə inkişaf etdiyini bildiriblər. Xaçaturyan İran şirkətinin Şimal-Cənub avtomobil dəhlizinin Mehri-Qacaran hissəsində həyata keçirdiyi işləri yüksək qiymətləndirərək, onların regional kommunikasiyaların inkişafında əhəmiyyətini qeyd edib.
Siyasi şərhçi Tural İrfan Sherg.az-a bildirib ki, Türkmənistanın Ermənistan ilə əlaqələri əvvəldən mövcuddur və İran şirkətinin dəhliz məsələsini Zəngəzura alternativ olaraq nəzərdə tuturlar. Lakin ekspert hesab edir ki, həm Türkmənistanın Azərbaycanla münasibətləri, həm də Ermənistan ilə sülh danışıqlarının getdiyi ərəfədə Azərbaycanın maraqlarına zidd addımların atılmasına yol verməzlər:
"Türkmənistanın İrəvanla yaxınlığı hər bir halda Türkiyə və Azərbaycanın eyni zamanda Türk birliyinin maraqlarına əks ola bilməz. Bunu Ermənistanın özü də yaxşı anlayır. Sadəcə, İranın burada pozuculuq fəaliyyəti Zəngəzur dəhlizinə qarşı yönəlmiş addımlardır. Mehri-Qacaran hissəsində Şimal-Cənub avtomobil dəhlizi Zəngəzur dəhlizi qədər əhəmiyyətli və mühüm deyil, onu əvəz edə bilməz. İran tərəfi mümkün qədər cəhd edir ki, Zəngəzur dəhlizinin əhəmiyyətini azaltsın, ona alternativ göstərməklə maneələr yaratsın. Yaxud özünün nəzarətində olan alternativ dəhliz həyata keçirsin. Hər bir halda bu kimi proseslər Zəngəzur dəhlizinin açılmasına əks olaraq hesablansa da, prosesin qarşısını ala bilməyəcək. Zəngəzur dəhlizi mütləq açılacaq".
