Biz Azərbaycanla müxtəlif regional formatlarda: MDB və ŞƏT, Asiyada Qarşılıqlı Fəaliyyət və Etimad Tədbirləri Müşavirəsi, “Xəzər beşliyi” və “3+3” regional əməkdaşlıq platforması, eyni zamanda, Avrasiya təhlükəsizlik arxitekturasının qurulması kontekstində sıx əməkdaşlıqda maraqlıyıq.
APA-nın Moskva bürosu xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə bildirib.
“Biz Bakı və Avrasiya İqtisadi İttifaqı ilə dialoqun güclənməsini görürük. Bunu Azərbaycanın Baş nazirinin Avrasiya Hökumətlərarası Şurasının iclaslarında fəxri qonaq qismində iştirak etməsinin yaxşı ənənəsi sübut edir. Sonuncu belə tədbir bu il sentyabrın 30-da Minskdə baş tutub.
Biz MDB formatında Bakı ilə əməkdaşlığımızı müsbət qiymətləndiririk. Tərəfdaşlarımız əməkdaşlığın müxtəlif sahələrində çox fəaldırlar. Məsələn, bu il Azərbaycan MDB-nin hər üç tematik paytaxtına ev sahibliyi edir. Məsələn, Qəbələ gənclər paytaxtı, Laçın mədəniyyət paytaxtı, Gəncə isə idman paytaxtıdır. Bu müddət ərzində sentyabrın 28-dən oktyabrın 8-dək Azərbaycanın yeddi şəhərində 23 idman növü üzrə 1500-dən çox idmançının iştirakı ilə III MDB Oyunları uğurla keçirilib. Bu barədə artıq şərh vermişik.
Əlbəttə ki, biz Bakının oktyabrın 10-da Düşənbə sammitinin bir sıra yekun sənədlərinə qoşulmasını alqışlayırıq. Buraya dövlət başçılarının transmilli cinayətkarlıqla mübarizə sahəsində əməkdaşlıq və Çernobıl AES-də baş vermiş faciənin 40-cı ildönümü ilə bağlı bəyanatları daxildir.
Azərbaycan həmçinin 2026-2028-ci illər üçün terrorizm və ekstremizmə qarşı mübarizədə əməkdaşlıq proqramının – MDB ölkələrinin regional təhlükəsizliyin təmin edilməsi üzrə birgə fəaliyyətinin konkret istiqamətləri üzrə mühüm ortamüddətli sənədin qəbulunu dəstəkləyib”, - Rusiya XİN sözçüsü qeyd edib.
