Egey dənizinin olduğu bölgə həm zəlzələlərin, həm də vulkanik fəaliyyətlərin ən aktiv olduğu bölgələrdən biridir.
Bu sözləri Axar.az-a açıqlamasında geoloq Mirismayıl Ağayev Egey dənizində baş verən zəlzələləri şərh edərkən bildirib.
Geoloqun sözlərinə görə, xüsusilə 28 yanvar 2025-ci ildən etibarən Santorini adası ətrafında seysmik aktivlik artıb:
“Təkcə 28 yanvardan bu günə qədər bölgədə 900-dən çox zəlzələ qeydə alınıb, bəziləri 5 balın üstündə olub və 5 km-dən 25 km-ə qədər dərinlikdə baş verib.
Ege dənizindəki bu geoloji fəaliyyətlərin əsas səbəbi burada yerləşən tektonik plitə sərhədləridir. Yəni Şimali Anadolu qırılma zonasından tutmuş Egey ana plitəsində qırılmalara qədər çoxsaylı tektonik sərhəd bu aktivliyin mənbəyidir.
Maraqlıdır ki, zəlzələ əsasən Kolumpo vulkanının yaxınlığında baş verir. Kolumpo vulkanı Santorini Vulkanik Kompleksinin bir hissəsidir və son dəfə 1650-ci ildə aktiv olub.
Qeyd edim ki, yerdaxili maqma hərəkətləri zəlzələlərə səbəb ola bildiyi kimi, zəlzələlər də vulkanik püskürmələri tətikləyir. Bu da həmin bölgədə sunami, ekoloji və sosial təsirlərə də gətirib çıxara bilər”.
