Avropa İttifaqında aparılan son araşdırmaya görə, 16 yaşdan yuxarı hər 25 nəfərdən biri tibbi xidmətə olan ehtiyacının qarşılanmadığını bildirib. Bu isə təxminən əhalinin 4 faizinə bərabərdir. Lakin göstəricilər ölkələr arasında ciddi fərqlənir. Məsələn, Kiprdə bu nisbət cəmi 0,2 faiz olduğu halda, Estoniyada 15,5 faizə qədər yüksəlir.
Sherg.az "Euronews"a istinadən xəbər verir ki, “qarşılanmayan tibbi ehtiyaclar” anlayışı həm şəxsi, həm də sistemlə bağlı səbəbləri əhatə edir. Şəxsi səbəblərə vaxt çatışmazlığı, həkimə getmək istəməmək və ya mütəxəssis tapmamaq daxildir. Sistemlə bağlı səbəblər isə uzun növbələr, tibbi xidmətlərin baha olması və xəstəxanaların uzaq məsafədə yerləşməsi kimi amillərlə bağlıdır.
Ümumilikdə, Avropa İttifaqında uzun növbələr 1,2 faiz, tibbi xidmətlərin bahalığı 1 faiz, uzaqlıq problemi isə 0,1 faiz səviyyəsindədir. Lakin bəzi ölkələrdə bu göstəricilər çox daha yüksəkdir. Məsələn, Estoniya, Yunanıstan və Albaniyada əhalinin 10 faizindən çoxu sistemlə bağlı səbəblər üzündən lazımi müalicəni ala bilmədiyini deyib.
Aparılan araşdırma həmçinin göstərir ki, gəlir səviyyəsi də tibbi xidmətlərə çıxışda mühüm rol oynayır. Aşağı gəlirli vətəndaşlar arasında tibbi ehtiyacların qarşılanmaması göstəricisi 3,8 faiz olduğu halda, yüksək gəlirli təbəqədə bu rəqəm cəmi 1,2 faizdir.
Maraqlıdır ki, rifah səviyyəsi yüksək olan ölkələrdə - Danimarka, Finlandiya və Norveçdə də bu problem müəyyən dərəcədə mövcuddur. Mütəxəssislər hesab edirlər ki, bu hal təkcə maliyyə amilləri ilə deyil, səhiyyə sisteminin təşkilati strukturu, infrastruktur və idarəetmə mexanizmlərindəki çatışmazlıqlarla da bağlıdır.
Araşdırmanın yekun nəticəsi göstərir ki, Avropa ölkələrinin əksəriyyətində tibbi xidmətlərə bərabər çıxış hələ də tam təmin olunmayıb və sosial-iqtisadi fərqlər bu sahədə mühüm rol oynamaqda davam edir.
