ABŞ-də aparılan bir araşdırma sosial media istifadəsinin uşaqlarda depressiya əlamətlərini artırdığını göstərib.
Kalifornia Universiteti San Francisko tərəfindən aparılan 3 illik araşdırmada uşaqların gündəlik sosial media istifadəsi 7 dəqiqədən 73 dəqiqəyə yüksəlib və eyni zamanda depressiya əlamətlərində 35% artım qeydə alınıb.
Sherg.az xəbər verir ki, araşdırmanın müəllifi Dr. Jason Naqata, sosial medianın depressiyaya təsir edib-etmədiyinin uzun müddətdir müzakirə olunduğunu, lakin tapıntıların sosial medianın depressiyaya töhfə verə biləcəyini göstərdiyini bildirib.
Eyni tədqiqat qrupu 11-12 yaşlı uşaqların kiber zorakılığa məruz qaldıqda intihar riskinin 2,6 dəfə artdığını aşkar edib.
Tədqiqatçılar sosial medianın uşaqlar üçün həm riskli davranışlarla əlaqəli olduğunu, həm də dostlarla ünsiyyət üçün mühüm platforma olaraq qaldığını vurğulayıb.
Dr. Nagata valideynlərin açıq və qərəzsiz ünsiyyətlə nümunə göstərməli olduğunu qeyd edib və ekran istifadəsində fasilələrin faydalı ola biləcəyini bildirib.
