Bayram süfrələrini plovsuz və şirniyyatsız təsəvvür etmək mümkün deyil. Hələ bu sıraya ikinci köməkçi yeməkləri və salatları da əlavə etmək lazımdır. Təntənəli yemək mərasimindən sonra isə süfrəyə cürbəcür dadlı şirniyyatlarla çay, çərəzlər, meyvələr gəlir. Beləcə, çox zaman yeməyə nəzarəti itiririk və yığdığımız kaloriləri nəzərə almırıq. Bayramdan sonra isə yığdığımız artıq çəkilərlə mübarizə, pəhriz, arıqlamaq qayğıları başlayır. Bəs bayramdan sonra necə qidalanmaq lazımdır?
Dietoloq Sevinc Həsənzadə "Sherg.az"a bildirib ki, hər birimizin evində bayram süfrəsində milli yeməklərimiz olur və həmin təamlardan dadmaq ciddi problem yaratmır:
“Çünki bu, uzun müddətli proses deyil. İki gün sonra yenidən sağlam qidaya qayıda bilərik. Xüsusi qaydalara əməl etməyə ehtiyac yoxdur. Sadəcə olaraq, un məmulatlarından az istifadə etmək məqsədəuyğundur. Həmçinin, gündəlik yeyilən qidanın həcmi bir qədər azaldıla bilər. Aktiv həyat tərzi də vacib rol oynayır. Lakin yaşlı insanlar və qeyd etdiyim xəstəliklərdən əziyyət çəkən şəxslər bayram günlərində də öz qida rejiminə diqqət etməlidir. Axşam saatlarında ağır yeməklər, şirniyyatların qəbulu məsləhət deyil. Qazlı və şirəli içkilərlə birlikdə qida qəbulu da yanlışdır. Belə qidalanma növbəti günlərdə köp və qəbzliyə, mədə ağrılarına səbəb ola bilər. Bayramdan sonrakı iki-üç gün ərzində qida rejimində müəyyən dəyişiklik sağlamlığımıza ciddi fəsad törətmir. Mədə problemi olan insanlar mədə ağrısına səbəb olan qidalardan uzaq durmalıdırlar. Əsasda bayramda qarışdırdıqları qidalardan. Məsələn, mədə şikayətləriniz varsa istifadə etməməli olduğunuz qidalar turşu, sarımsaq, limon duzu, zeytun, ədviyyatlı yeməklər və çoxlu tomat pastası olanlar daxildir. Quru paxlalılar qaz və şişkinlik problemlərinə səbəb ola biləcəyi üçün onların istehlak tezliyini azaldın.”
