Beyin dövranını yaxşılaşdıran pəhrizə əməl etdikdə, qan dövranı yaxşılaşa bilər.
Medicina.az xəbər verir ki, beynəlxalq alimlər qrupunun araşdırmalarına görə, ketopəhriz beyinə qan tədarükünü əhəmiyyətli dərəcədə yaxşılaşdıra və neyronların sağlamlığını artıra bilər.
Bu, koqnitiv pozğunluğu olmayan sağlam insanlarda əldə edilən ilk klinik nəticədir.
BDNF - beyindən əldə edilən neyrotrofik faktor neyronların sağ qalması, yaddaşın formalaşması və öyrənilməsi üçün cavabdehdir. Onun azalması Alzheymer xəstəliyi ilə əlaqələndirilir.
Tədqiqatda 50-70 yaş arası böyüklər iştirak edib. Onların hamısı ardıcıl olaraq iki üç həftəlik pəhriz tutub: standart pəhriz və ketogenik pəhriz (75% yağ, 20% protein, 5% karbohidrat). Keto pəhrizi ilə iştirakçılar ketoz vəziyyətinə çatıb, orqanizm keton cisimlərini alternativ enerji mənbəyi kimi istifadə etməyə başlayır.
Keto pəhrizində üç həftədən sonra onların beyin qan axını orta hesabla 22%, BDNF zülalının səviyyəsi isə 47% artıb. Müəlliflərin fikrincə, ketonlar təkcə beyni enerji ilə təmin etmir, həm də hüceyrə səviyyəsində qoruyucu mexanizmləri aktivləşdirir.
Alimlər vurğulayırlar ki, keto pəhriz yetkinlik dövründə beyin sağlamlığını qorumaq üçün potensial vasitə ola bilər, lakin yekun nəticə çıxarmaq üçün daha geniş və daha uzun tədqiqatlara ehtiyac var.
