Mimikalardan istifadə kiçik yaşlardan xüsusilə alında, qaşların arasında, göz və ağız ətrafında cizgilərin yaranmasına səbəb ola bilər. Botoks bu qırışların gələcək illərdə qalıcı olmasının qarşısını almaq üçün ideal bir tibbi müalicə üsuludur. Lakin botoksdan hansı yaş dövründə istifadə daha faydalıdır?
“Sherg.az” “NTV.com.tr”yə istinadən bildirir ki, əksər insanlar ilk cizgiləri və qırışları 30 yaşların əvvəllərində görürlər. Lakin bu xətlər adətən 30 yaşın sonlarına qədər dərinləşmir. Ancaq mimika istifadəsi həddindən artıq olmasa belə, bu yaşda qaşlar arası və göz ətrafı xətlər daha çox nəzərə çarpa bilər. Genetik faktorlarla yanaşı günəş şüaları, spirt və siqaret istifadəsi fərdlərdə erkən yaşlarda qırışların yaranmasına səbəb ola bilər. Stress faktoru 30 yaşın əvvəlində olan insanlarda qırışların əmələ gəlməsində ən mühüm amillərdən biridir. Bu, stressin dərinin özünü sağaltmaq qabiliyyətini ləngitməsi ilə izah olunur. Ancaq botoks etdirərkən göz ətrafındakı qırışların təbii gülüşün ən vacib elementi olduğunu unutmamalı və təbiiliyi qoruyacaq dozanın vurulmasına diqqət edilməlidir.
Botoks düzgün tətbiq edildikdə, ümumiyyətlə, təhlükəsiz sayılan bir müalicə üsuludur, lakin həddindən artıq və ya yanlış tətbiq bəzi risklər yarada bilər. Botoks əzələləri müvəqqəti iflic edərək işlədiyi üçün tətbiq edilən bölgədə ağrı, baş ağrısı, əzələ zəifliyi və nadir hallarda allergik reaksiyalar kimi yan təsirlər meydana gələ bilər. Bundan əlavə, təcrübəsiz insanlar tərəfindən həyata keçirildikdə, asimmetriya və ya arzuolunmaz üz ifadələri kimi estetik problemlər yarana bilər. Buna görə də botoks tətbiqləri təcrübəli mütəxəssislər tərəfindən aparılmalıdır.
