Böyük Britaniya hökuməti dünyanın aparıcı alimlərini ölkəyə cəlb etmək məqsədi daşıyan yeni təşəbbüsü təqdim etməyə hazırlaşır.
AZƏRTAC “Financial Times”a istinadla xəbər verir ki, 50 milyon funt sterlinq dövlət maliyyəsi ilə dəstəklənəcək proqram beynəlxalq miqyasda seçilmiş elmi komandaların tədqiqat qrantları ilə təmin olunmasını və onların Böyük Britaniyaya köçürülməsi xərclərini əhatə edəcək. Təşəbbüs, dünyanın müxtəlif ölkələrindən olan tədqiqatçıları cəlb etməyi hədəfləyir və onların işlərinin Böyük Britaniyanın sənaye strategiyasında müəyyənləşdirilmiş prioritet sahələrə uyğunluğu əsasında qiymətləndiriləcək.
Prioritet sahələr arasında dəqiq elmlər, süni intellekt və yaşıl enerji texnologiyaları yer alır. Proqramın ilkin mərhələsində təxminən 10 tədqiqat komandasının Britaniyaya köçməsi və burada fəaliyyətə başlaması nəzərdə tutulur. Hökumət mənbələrinin sözlərinə görə, proqram uğurlu olarsa, onun miqyasının genişləndirilməsi də planlaşdırılır.
Bu təşəbbüs Böyük Britaniyanı beynəlxalq elm və texnologiya mərkəzinə çevirmək məqsədi daşıyır.
