COVİD-19-da yeni variantlar gündəmdədir. Nimbus (NB.1.8.1) və Stratus (XFG) adlanan tiplər son həftələrdə dünya üzrə ən çox yayılan variantlar arasında önə çıxıb. Səhiyyə qurumları bu variantların yoluxma sürətinin artdığını açıqlayıb. Bəs, COVİD-19-un yeni variantları Nimbus və Stratus haqqında nə məlumdur? Nimbus və Stratusun əlamətləri hansılardır?
Sherg.az “ntv.com.tr”yə istinadən xəbər verir ki, COVİD-19-da son dövrdə önə çıxan Nimbus (NB.1.8.1) və Stratus (XFG) variantları dünyada ən çox yayılan tiplər arasında yer almağa başlayıb. Səhiyyə orqanları bu variantların yayılma sürətində artıma diqqət çəkərkən, ictimai sağlamlıq baxımından yeni bir təhdid yaratmadığını vurğulayır.
Mütəxəssislərə görə, virusun son dövrdə keçirdiyi genetik dəyişikliklər yoluxma ehtimalını artıra bilər. Ancaq indiyə qədər əldə olunan nəticələr Nimbus və Stratusun əvvəlki variantlarla müqayisədə daha ağır xəstəliklərə səbəb olmadığını göstərir.
Rəsmi qurumlar, cəmiyyətdə yoluxma sayında artım ola biləcəyini, lakin xəstəliyin daha ağır keçirildiyinə dair heç bir məlumatın qeydə alınmadığını bildirir.
COVİD -19 infeksiyası baş ağrısı, öskürək, burun axması və ya tutulması, güclü halsızlıq kimi geniş simptomlarla özünü göstərə bilir. Bu isə xəstəliyi soyuqdəymə və ya qripdən ayırmağı çətinləşdirir.
Yoluxma yolları əvvəlki COVİD-19 variantları ilə eynidir. Virus öskürək, asqırıq və nəfəs yolu ilə havaya yayılan damcılar vasitəsilə insandan insana keçir. Mütəxəssislər xüsusilə qapalı və izdihamlı məkanlarda maska, gigiyena və havalandırma tədbirlərinin hələ də önəmli olduğunu xatırladır.
Bundan başqa, koronavirusdan qorunmaq üçün xüsusilə yaşlı insanların və xroniki xəstəlikləri olan şəxslərin izdihamlı məkanlarda daha diqqətli olmaları tövsiyə edilir.
